នាយករដ្ឋមន្ត្រីនូវ៉ែលហ្សេឡង់ លោក Chris Hipkins បានថ្លែងនៅថ្ងៃចន្ទ (ទី១៧ កក្កដា)នេះថា តំបន់ប៉ាស៊ីហ្វិក កាន់តែមានការប្រកួតប្រជែងខ្លាំងឡើង និងលែងសូវមានសុវត្ថិភាព ខណៈដែលប្រទេសចិនកាន់តែមានឥទ្ធិពលខ្លាំងឡើង ដោយគូសបញ្ជាក់អំពីតម្រូវការរបស់ប្រទេសក្នុងការធ្វើការជាមួយដៃគូដែលមានគំនិតដូចគ្នា ខណៈពេលដែលនៅតែចូលរួមជាមួយទីក្រុងប៉េកាំង។

លោក Hipkins បាននិយាយនៅក្នុងសុន្ទរកថាមួយនៅឯកិច្ចប្រជុំកំពូលពាណិជ្ជកម្មចិន នៅទីក្រុង Auckland ថា ការកើនឡើងរបស់ប្រទេសចិន និងរបៀបដែលប្រទេសនេះ ប្រើឥទ្ធិពលនោះ គឺជាកត្តាជំរុញដ៏សំខាន់នៃការប្រកួតប្រជែងជាយុទ្ធសាស្ត្រ ជាពិសេសនៅក្នុងតំបន់ឥណ្ឌូ-ប៉ាស៊ីហ្វិក។

លោកបានបន្តថា៖«តំបន់របស់យើង កំពុងមានការប្រកួតប្រជែងកាន់តែច្រើន ការព្យាករណ៍លែងសូវជាក់លាក់ និងលែងសូវមានសុវត្ថិភាព»។ “ហើយវាបង្កបញ្ហាប្រឈមសម្រាប់ប្រទេសតូចៗដូចជានូវែលសេឡង់ដែលពឹងផ្អែកលើស្ថិរភាព និងការទុកចិត្តលើនៃច្បាប់អន្តរជាតិសម្រាប់វិបុលភាព និងសន្តិសុខរបស់យើង។

លោកបានបន្ថែមថា ទំនាក់ទំនងត្រូវការការគ្រប់គ្រងដោយប្រុងប្រយ័ត្ន ប៉ុន្តែប្រទេសចិន នៅតែជាដៃគូពាណិជ្ជកម្មដ៏សំខាន់។

សុន្ទរកថារបស់លោក Hipkins នៅក្នុងព្រឹត្តិការណ៍ប្រចាំឆ្នាំ កើតឡើងមិនដល់មួយខែ បន្ទាប់ពីលោក បានដឹកនាំបេសកកម្មពាណិជ្ជកម្មប្រកបដោយជោគជ័យទៅកាន់ប្រទេសចិនដែលជាដៃគូពាណិជ្ជកម្មដ៏ធំបំផុតរបស់នូវែលសេឡង់ ជាកន្លែងដែលលោកប្រឈមមុខ នឹងការរិះគន់ក្នុងស្រុកមួយចំនួនចំពោះការមិនបញ្ចេញសំឡេងលើសិទ្ធិមនុស្ស និងបញ្ហាផ្សេងទៀតដូចការរំពឹងទុក៕