ភ្នំពេញ៖ ប្រជាពលរដ្ឋដែលជាអាជីករ អ្នករត់ម៉ូតូ និងកង់បី នៅព្រឹកថ្ងៃទី១៧ កក្កដា ឆ្នាំ២០២៣នេះ បានកត់សម្គាល់ ឃើញថា បាននាំគ្នាស្នើសុំធ្វើប័ណ្ណ ប.ស.ស. ដើម្បីទទួលបានផ្នែកសេវាព្យាបាល ថែទាំវេជ្ជសាស្រ្ត និងប្រាក់បំណាច់ មាតុភាព តាមរយៈរបបភាគទានដោយស្ម័គ្រចិត្ត ដើម្បីចូលជាសមាជិករបស់បេឡាជាតិសន្តិសុខសង្គម។

 លោក លឹម សោភ័ណ្ឌតារ៉ា ប្រធានសាខាបេឡាជាតិសន្តិសុខសង្គម (ប.ស.ស) ខណ្ឌពោធិ៍សែនជ័យ នៅក្នុង កិច្ច សម្ភាសន៍ជាមួយទូរទស្សន៍ព័ត៌មាន ប៊ីធីវី បានមានប្រសាសន៍ថា គិតចាប់ពីដើមខែកក្កដា រហូតមកដល់ពេលនេះ សម្រាប់សាខាលោក បុគ្គលស្វ័យនិយោជន៍ ដែលសំដៅដល់ប្រជាពលរដ្ឋរកប្រាក់ចំណូលផ្ទាល់ខ្លួន ដូចជា អាជីករ អ្នករត់ម៉ូតូ និងកង់បី...ជាច្រើនរយនាក់ បានស្នើសុំធ្វើប័ណ្ណ ប.ស.ស. បន្ទាប់ពីពួកគាត់ទទួលបានព័ត៌មាន តាមរយៈ ការផ្សព្វផ្សាយនានារបស់ ប.ស.ស ។

ទាក់ទិនការស្នើសុំធ្វើប័ណ្ណ ប.ស.ស. សម្រាប់បុគ្គលស្វ័យនិយោជន៍នេះដែរ លោកបានបញ្ជាក់ថា បុគ្គលដែល អាចស្នើសុំធ្វើប័ណ្ណសមាជិក ប.ស.ស. នេះបាន ត្រូវគោរពតាមលក្ខខណ្ឌដូចជា ត្រូវបង់ភាគទាន ១៥ ៦០០រៀល ក្នុងមួយខែ, មានមុខរបរ និងប្រាក់ចំណូលផ្ទាល់ខ្លួន ហើយមិនពាក់ព័ន្ធប្រាក់ឈ្នួល, ធ្វើការងារ ឬប្រកបរបរអាជីវកម្ម ផ្ទាល់ខ្លួនដោយមិនប្រើប្រាស់បុគ្គលិក, ត្រូវមានអាយុមិនលើសពី៦០ឆ្នាំ គិតត្រឹមកាលបរិច្ឆេទស្នើចុះបញ្ជីនៅ ប.ស.ស, សាមីខ្លួនត្រូវអញ្ជើញទៅស្នើសុំធ្វើបណ្ណ ប.ស.ស. ដោយផ្ទាល់ និងភ្ជាប់ជាមួយនូវអត្តសញ្ញាណប័ណ្ណសញ្ជាតិខ្មែរច្បាប់ ដើម។

កញ្ញា អ៊ុយ ម៉ារី អាជីករលក់រានទេវតានៅម្តុំចោមចៅ បាននិយាយថា កញ្ញាពិតជាសប្បាយចិត្តណាស់ ដែលរដ្ឋាភិបាល អនុញ្ញាតឲ្យប្រជាពលរដ្ឋ ដែលរកចំណូលផ្ទាល់ខ្លួន អាចធ្វើប័ណ្ណ ប.ស.ស.បានដូចអ្នកធ្វើការដែរ។ កញ្ញាសង្ឃឹមថា បណ្ណ ប.ស.ស នេះ នឹងមានប្រសិទ្ធិភាពកាន់តែច្រើនបន្ថែមទៀតនៅពេលអនាគត សម្រាប់ប្រជាពលរដ្ឋដែលរ​កប្រាក់​ចំណូលដោយខ្លួនឯង។

ពាក់ព័ន្ធការស្នើសុំធ្វើប័ណ្ណ ប.ស.ស នេះដែរ ប្រជាពលរដ្ឋមកពីតំបន់ផ្សេងៗគ្នាក្នុងខណ្ឌពោធិ៍សែនជ័យ បានបង្ហាញទឹក​មុខសប្បាយរីករាយ និងលើកឡើងស្រដៀងគ្នាថា បណ្ណ ប.ស.ស នេះ ពិតជាមានសារៈសំខាន់ណាស់ ក្នុងការជួយកាត់​បន្ថយចំណាយក្នុងគ្រួសារ ជាពិសេសនៅពេលដែលពួកគាត់មានបញ្ហាសុខភាព ដែលតម្រូវឲ្យព្យាបាល និងថែទាំ៕ ដោយ ៖ បូរ៉ាវី