កសិករនៅក្នុងរដ្ឋមួយចំនួននិយាយថា ជម្លោះរវាងក្រុមយោធា នៅក្នុងប្រទេសស៊ូដង់ កំពុងដាក់ហានីភ័យក្នុងការផលិតដំណាំសំខាន់ៗនៅឆ្នាំនេះ ដែលកំពុងគំរាមកំហែងជំរុញឲ្យប្រទេសអាហ្វ្រិកមួយនេះ ធ្លាក់កាន់តែជ្រៅក្នុងភាពអត់ឃ្លាន និងភាពក្រីក្រ។ សារព័ត៌មានរ៉យទ័រ បាននិយាយទៅកាន់បុគ្គលិកផ្តល់ជំនួយ ដែលបានរាយការណ៍ពីការពន្យារពេលក្នុងការដំាដំណាំដូចជាធញ្ញជាតិស្ពៅនិងស្រូវមីយេ ដោយសារតែកង្វះខាតឥណទានពីធនាគារ និងតម្លៃខ្ពស់នៃទិន្នផលសំខាន់ៗ ដូចជាជី គ្រាប់ពូជ និងប្រេងឥន្ធនៈ។

ស្ថានភាពកាន់តែអាក្រក់ សម្រាប់កសិករដែលនិយាយពីវិបត្តិភាពអត់ឃ្លានដែលជិតចូលមកដល់ អាចធ្វើឲ្យកាន់តែធ្ងន់ធ្ងរជាងការព្យាករណ៍របស់អង្គការសហប្រជាជាតិ និងបុគ្គលិកផ្តល់ជំនួយ។ នៅក្នុងខែឧសភា អង្គការសហប្រជាជាតិ បាននិយាយថា ខ្លួនបានប៉ាន់ប្រមាណថា ចំនួនប្រជាជនដែលនឹងជួបភាពអត់ឃ្លាននៅក្នុងប្រទេសស៊ូដង់ នឹងកើនឡើងដល់១៩,១ លាននាក់នៅត្រឹមខែសីហា ពី១៦,២លាននាក់ដោយសារតែជម្លោះ ដែលបានចាប់ផ្តើមក្នុងខែមេសា។

យោងតាមអង្គការកសិកម្មនិងស្បៀងអាហារអង្គការសហប្រជាជាតិ(FAO) បានឲ្យដឹងថា ជិត៦៥ភាគរយនៃចំនួនប្រជាជនស៊ូដង់៤៩លាននាក់ បានចូលរួមនៅក្នុងវិស័យកសិកម្ម។ អង្គការ FAO បាននិយាយកាលពីសប្តាហ៍មុនថា អង្គការបានចាប់ផ្តើមការចែកចាយបន្ទាន់នូវគ្រាប់ពូជធញ្ញជាតិស្ពៅនិងស្រូវមីយេ សណ្តែកដី និងគ្រាប់ពូជល្ង ហើយសង្ឃឹមថា ឆ្លងកាត់សន្តិសុខស្មុគស្មាញ និងបញ្ហាប្រឈមផ្នែកដឹកជញ្ជូន ដើម្បីផ្តល់បានគ្រប់គ្រាន់លប់លើតម្រូវការមនុស្ស១៣ដល់១៩លាននាក់។

កម្មវិធីស្បៀងអាហារពិភពលោកអង្គការសហប្រជាជាតិ និយាយថា ស្ថាប័ននេះនេះនឹងបន្តវិភាគពីស្ថានភាពក្នុងរយៈពេល៦ខែបន្ទាប់ និងបន្ទាប់ពីការដាំនិងរដូវកាលប្រមូលផល។