ខ្សែបម្រើអាល្លឺម៉ង់ Ilkay Gundogan បានបង្ហាញខ្លួនផ្លូវការនៅចំពោះមុខអ្នកសារព័ត៌មាន ជាកីឡាកររបស់ក្លិប អេស្ប៉ាញ FC Barcelona។

កីឡាករជម្រើសជាតិអាល្លឺម៉ង់វ័យ ៣២ ឆ្នាំរូបនេះ បានបង្ហាញខ្លួននៅទីលានហ្វឹកហាត់របស់ក្លិបនៅថ្ងៃចន្ទម្សិលមិញក្រោយចុះហត្ថលេខា ២ ឆ្នាំ បន្ទាប់ពីចាកចេញពី Manchester City។

នៅពេលត្រូវបានអ្នកសារព័ត៌មានសួរពីមូលហេតុនៃការផ្លាស់មកកាន់ Barcelona, Ilkay Gundogan បានឱ្យដឹងថា ការសម្រេចមកកាន់ទីនេះគឺជាការសម្រេចមិនពិបាកឡើយ នៅទីនេះមានកីឡាករដែលលេងតួនាទីដូចរូបគេច្រើនដែលមានទេពកោសលដូចជា Gavi, Pedri និង Luuk de Jong ជាដើម ហើយសង្ឃឹមថាគេនឹងអាចយកបទពិសោធក្រាសក្រែលរបស់ខ្លួនដើម្បីចែករំលែងដល់ពួកគេ។

ក្រោមការដឹកនាំរបស់ Pep Guardiola នៅ Manchester City, Gundogan រំពឹងថាការមកកាន់ Barcelona នឹងអាចសម្របខ្លួនដោយងាយតាមរយៈរបៀបលេងក្រោមការដឹកនាំរបស់អ្នកចាត់ការ Xavi Hernandez ដែលធ្លាប់រួមការយ៉ាងជិតស្និតជាមួយ Pep Guardiola។

រំលឹកថាខ្សែបម្រើជាម្រើសជាតិអាល្លឺម៉ង់រូបនេះ បានផ្លាស់មកកាន់ Manchester City នៅឆ្នាំ ២០១៦ ក្នុងផ្ទេរ ២០ លានផោនពី Borussia Dortmund និងបានបង្ហាញខ្លួនមកទល់ពេលនេះសរុប ៣០៤ ប្រកួតរកបាន ៦០ គ្រាប់ ជាពិសេសគឺរដូវកាលចុងក្រោយដែលគេបង្ហាញខ្លួន ៥១ ប្រកួតរកបាន ១១ ​គ្រាប់ជួយ Manchester City ឈ្នះពានបីក្នុងមួយរដូវកាលរួមមាន English Premier League, FA Cup និង UEFA Champions League៕ អត្ថបទ៖ នាង សុភាវុធ