ឥណ្ឌា ៖ ប្រជាជននៅទីក្រុងញូវដេលី (New Delhi) ដែលបានបាត់បង់លំនៅឋានដោយសារទឹកជំនន់ កំពុងរស់នៅ​ក្នុងជំរំបណ្តោះអាសន្នតាមដងផ្លូវ ដោយមានគ្រឿងបរិក្ខារប្រើប្រាស់តិចតួច កាលពីថ្ងៃចន្ទ (ថ្ងៃទី១៧ ខែកក្កដា)។

ជនរងគ្រោះដោយទឹកជំនន់ ដូចជាលោកស្រី Anita និងស្វាមី ដែលពឹងផ្អែកលើការធ្វើស្រែចំការញ្ចឹមជីវិត និងដែល​បាត់បង់ផលដំណាំក្នុងគ្រោះមហន្តរាយនោះ កំពុងរស់នៅក្នុងទីលំនៅដែលយកមេឃជាដំបូល ខណៈដែល​គេហដ្ឋាន​របស់ពួកគេ ត្រូវលិច ក្នុងទឹកជំនន់។

ទឹកទន្លេ Yamuna បានឡើងដល់កម្រិតខ្ពស់បំផុត ក្នុងរយៈពេល ៤៥ឆ្នាំកាលពីសប្តាហ៍មុន បន្ទាប់ពីមានភ្លៀងធ្លាក់ខ្លាំង​ខុសធម្មតា នៅក្នុងទីក្រុង ដោយទឹកហូរពីរដ្ឋតំបន់ជួរភ្នំទៅភាគខាងជើង ក៏បណ្តាលឲ្យកម្រិតទឹក​របស់ទន្លេកើន​ឡើងផងដែរ។ រដ្ឋាភិបាលក្រុងញូវដេលី បាននិយាយថា មនុស្សរាប់ពាន់នាក់ត្រូវបានជម្លៀសទៅកាន់ជំរំសង្គ្រោះ ដើម្បីគេចចេញពីទឹកជំនន់នេះ។

នៅភាគឦសានរដ្ឋអាសាំ (Assam) បន្ទាប់ពីមានភ្លៀងធ្លាក់ខ្លាំង ទន្លេព្រហ្មបុត្រ (Brahmaputra) បានបាក់ច្រាំង និងជន់លិចដីស្រែចម្ការ ព្រមទាំងភូមិជាច្រើនទៀត កាលពីថ្ងៃចន្ទ (ទី១៧ ខែកក្កដា)។ កម្រិតទឹករបស់ទន្លេនេះ បានបង្ខំឲ្យអ្នកភូមិរាប់ពាន់នាក់ភៀសខ្លួនចេញពីលំនៅឋានទៅកាន់ទីកន្លែងសុវត្ថិភាព។ ច្រាំងទន្លេព្រហ្មបុត្រ (Brahmaputra) បានហូរច្រោះ ដែលធ្វើឲ្យពិបាក ក្នុងការទប់ទឹកដ៏ហូរហៀ ក្នុងរដូវមូសុងនេះ៕