អាមរិក ៖ សហរដ្ឋអាមេរិក និងកូរ៉េខាងត្បូង បានបើកកិច្ចប្រជុំលើកដំបូងនៃក្រុមថ្មីមួយ ដែលនឹងពិភាក្សា​អំពីវិធីដើម្បីរារាំងកូរ៉េខាងជើងពីការប្រើប្រាស់អាវុធបរមាណូរបស់ខ្លួន និងពិភាក្សាអំពីរបៀបដែលល្អបំផុត ក្នុងការគ្រប់គ្រងយុទ្ធោបករណ៍នុយក្លេអ៊ែររបស់អាមេរិកនៅក្នុងតំបន់។

លោកប្រធានាធិបតី Yoon Suk Yeol បាននិយាយថា កិច្ចប្រជុំលើកដំបូងនៅថ្ងៃអង្គារ នៅទីក្រុងសេអ៊ូអំពីអ្វី​ដែលគេស្គាល់ថា ជាក្រុមប្រឹក្សាយោបល់នុយក្លេអ៊ែរ ដ៏មានអត្ថន័យ ហើយស្ថាប័ននេះ គួរតែឆ្លើយតប​ទៅនឹង​ការកើនឡើងនៃការគំរាមកំហែងនុយក្លេអ៊ែរ និងមីស៊ីលរបស់កូរ៉េខាងជើង ដោយការពង្រឹង​ការអនុវត្តសន្ធិសញ្ញា​ការពារសម្ព័ន្ធមិត្ត នេះបើយោងតាមសេចក្តីថ្លែងការណ៍មួយផ្តល់ដោយការិយាល័យរបស់លក។

កិច្ចប្រជុំនេះ ដែលដឹកនាំដោយលោក Kim Tae-hyo អនុប្រធានទីមួយនៃការិយាល័យសន្តិសុខជាតិកូរ៉េខាងត្បូង និងលោក Kurt Campbell អ្នកសម្របសម្រួលសេតវិមានសម្រាប់កិច្ចការឥណ្ឌូ-ប៉ាស៊ីហ្វិក។ ក្រុមនេះ បានកើត​ចេញពីកិច្ចប្រជុំកំពូលនៅទីក្រុងវ៉ាស៊ីនតោនក្នុងខែមេសារវាងប្រធានាធិបតី ចូ បៃដិន  និង Yoon ដែលទទួល​បានផលប្រយោជន៍នយោបាយដ៏ធំច្រើនសន្ធឹកសន្ធាប់ ក្នុងការខិតទៅកៀកសហរដ្ឋអាមេរិក។

ក្រុមនេះ ផ្តល់ឱ្យកូរ៉េខាងត្បូងនូវការបញ្ចេញមតិកាន់តែច្រើនអំពីរបៀបដែល​អាមេរិកដាក់​ពង្រាយក្រុមនុយក្លេអ៊ែរ​របស់ខ្លួន និងការធានាថា វានឹងត្រូវបានប្រើ ដើម្បីសងសឹកប្រឆាំងនឹងការវាយប្រហាររបស់កូរ៉េខាងជើង។ ខណៈពេលដែលលោក Yoon ទទួលបានការប្តេជ្ញាចិត្តពីរដ្ឋបាលលោកបៃដិន​ក្នុងការពង្រឹងការរារាំង​របស់​ខ្លួនប្រឆាំង​នឹងទីក្រុងព្យុងយ៉ាង ការសម្រេចចិត្តចុងក្រោយស្តីពីការប្រើប្រាស់អាវុធនុយក្លេអ៊រ នៅតែមាន​ជាមួយនឹង​សហរដ្ឋអាមេរិក៕