កំពង់ឆ្នាំង៖ រដ្ឋបាលខេត្តកំពង់ឆ្នាំង បានប្រកាសពីការរកឃើញស្ត្រីម្នាក់អាយុ ៤៨ឆ្នាំ បានឆ្លងមេរោគកូវីដ-១៩នៅស្រុករលាប្អៀរ បន្ទាប់ពីពាក់ព័ន្ធនឹងកូនស្រីដែលបានវិលត្រឡប់ពីធ្វើការនៅរាជធានីភ្នំពេញ។
ក្នុងសេចក្ដីប្រកាសព័ត៌មាននៅថ្ងៃនេះ រដ្ឋបាលខេត្តកំពង់ឆ្នាំបញ្ជាក់ថា ស្ត្រីវ័យ ៤៨ឆ្នាំម្នាក់ដែលសព្វថ្ងៃរស់នៅភូមិអណ្ដូងចេក ឃុំជើងគ្រាវ បានឆ្លងមេរោគកូវីដ-១៩ពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ។
រដ្ឋបាលខេត្តមួយនេះបញ្ជាក់បន្ថែមថា ស្ត្រីរូបនេះត្រូវបានបញ្ជូនទៅសម្រាកព្យាបាលនៅមណ្ឌលព្យាបាលស្ថិតក្នុងវិទ្យាល័យ ហ៊ុន សែន កំពង់ត្រឡាច។
បើតាមរដ្ឋបាលខេត្តកំពង់ឆ្នាំ ស្ត្រីរូបនេះ បានពាក់ព័ន្ធនឹងកូនដែលបម្រើការនៅរោងចក្រមួយនៅឃុំបែចាន ស្រុកអង្គស្នួល ខេត្តកណ្ដាល ហើយកូនស្រីគាត់បានវិលត្រឡប់ទៅលេងផ្ទះនៅឯស្រុកកំណើតកាលពី ២សប្ដាហ៍មុន។
រដ្ឋបាលខេត្តកំពង់ឆ្នាំងក៏បានអំពាវនាវដល់អ្នកប៉ះពាល់នឹងអ្នកជំងឺកូវីដ-១៩រូបនេះ ឱ្យទៅផ្ដល់សំណាកដើម្បីពិនិត្យរកមេរោគ និងរក្សាខ្លួននៅដាច់ដោយឡែកដើម្បីតាមដានសុខភាពខ្លួនឯង៕អត្ថបទ ៖ សុធី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
