អាមេរិក ៖ សារអេឡិចត្រូនិកយោធាអាមេរិករាប់លាន ត្រូវបានផ្ញើច្រឡំទៅប្រទេសម៉ាលី ដែលជាសម្ព័ន្ធមិត្ត​របស់​រុស្ស៊ី​ដោយអចេតនា ដោយសារកំហុសបច្ចេកទេសតិចតួច។

សារអេឡិចត្រូនិកមួយចំនួនត្រូវបានគេរាយការណ៍ថាមានព័ត៌មានរសើបដូចជាពាក្យសម្ងាត់ កំណត់ត្រាវេជ្ជសាស្រ្ត និងកំណត់ត្រាដំណើររបស់មន្ត្រីជាន់ខ្ពស់ជាច្រើន។ មន្ទីរបញ្ចកោណបាននិយាយថា ខ្លួនបានចាត់វិធាន​ការដើម្បីដោះ​ស្រាយ​បញ្ហានេះហើយ។

យោងតាមសារព័ត៌មាន Financial Times ដែលបានរាយការណ៍រឿងនេះជាលើកដំបូងមានឲ្យដឹងថា សហគ្រិន​អ៊ីនធឺណិត​ហូឡង់លោក Johannes Zuurbier បានរកឃើញបញ្ហាបច្ចេកទេសនេះកាលពីជាង១០ឆ្នាំមុនមកម្ល៉េះ។

ចាប់តាំងពីឆ្នាំ២០១៣មក លោកមានកិច្ចសន្យាគ្រប់គ្រងដែនបច្ចេកវិទ្យារបស់ប្រទេសម៉ាលី ហើយក្នុងរយៈ​ពេលប៉ុន្មាន​ខែថ្មីៗនេះ មានសេចក្តីរាយការណ៍ថាយោធាអាមេរិកបានប្រមូលសារអេឡិចត្រូវ​និកដែលផ្ញើខុស​ទិសដៅចំនួន​រាប់ម៉ឺន​សារ។

យោងតាមក្រុមមន្ត្រីអាមេរិកបច្ចុប្បន្ន និងកាលពីមុនបានឲ្យដឹងថា ទំនាក់ទំនងយោធាអាមេរិកដែលត្រូវបានសម្គាល់ថា "សម្ងាត់" និង "អាថ៌កំបាំងខ្លាំង" ត្រូវបានបញ្ជូនតាមរយៈប្រព័ន្ធបច្ចេកវិទ្យាព័ត៌មានIT ដាច់ដោយឡែក ដែលធ្វើ​ឱ្យ​ហេតុការណ៍នេះមិនទំនងជាត្រូវបានកើតឡើងដោយចៃដន្យនោះទេ៕