មន្ទីរបច្ចកោណ បាននិយាយកាលពីថ្ងៃចន្ទថា សហរដ្ឋអាមេរិក នឹងបញ្ជូនយន្តហោះចម្បាំង F-35 និង F-16 បន្ថែមទៀត ជាមួយនឹងនាវាចម្បាំងទៅកាន់តំបន់មជ្ឈិមបូព៌ា ដើម្បីតាមដានផ្លូវទឹកនៅក្នុងតំបន់នោះ បន្ទាប់ពីការរំខាន និងការរឹបអូសនាវាដឹកទំនិញពាណិជ្ជកម្មពីសំណាក់អ៊ីរ៉ង់ ក្នុងរយៈពេលប៉ុន្មានខែកន្លងមកនេះ ។  

 លោក Sabrina Singh គឺជាអ្នកនាំពាក្យក្រសួងការពារជាតិសហរដ្ឋអាមេរិក និយាយថា មន្ទីរបច្ចកោណនឹងបង្កើនវត្តមាន និងសមត្ថភាពរបស់ពួកយើង ដើម្បីតាមដានច្រកសមុទ្រ Hormuzហើយនិងដែនទឹកនៅជុំវិញនោះ ។  

កាលពីខែឧសភាកន្លងទៅ សេតវិមាន បានប្រកាសថា រដ្ឋបាលរបស់លោក Joe Biden នឹងចាត់វិធានការជាច្រើននៅក្នុងតំបន់មជ្ឈិមបូព៌ា ប៉ុន្តែនៅពេលនោះ ពួកគេពុំបាននិយាយថាជាវិធានការអ្វីនោះទេ ។  

កាលពីដើមខែនេះ កងទ័ពជើងទឹកសហរដ្ឋអាមេរិក និយាយថា ពួកគេបានធ្វើអន្តរាគមន៍ ដើម្បីរារាំងអ៊ីរ៉ង់ពីការរឹបអូសនាវាដឹកប្រេង២គ្រឿងនៅតំបន់ឈូងសមូទ្រអូម៉ង់ ។  

ចាប់តាំងពីឆ្នាំ ២០១៩មក មាននូវការវាយប្រហារជាបន្តបន្ទាប់លើការដឹកញ្ជូនតាមផ្លូវទឹកក្នុងឈូងសមុទ្រយុទ្ធសាស្រ្តអូម៉ង់ នៅពេលកើតមានភាពតានតឹងរវាងសហរដ្ឋអាមេរិក និងអ៊ីរ៉ង់ ។  

 ប្រហែល ១ភាគ៥នៃប្រេងឆៅ និងផលិតផលប្រេងពិភពលោក បានឆ្លងកាត់ច្រកសមុទ្រ Hormuzដែលជាចំណុចភូមិសាស្រ្តដ៏សំខាន់រវាងអ៊ីរ៉ង់ និងអូម៉ង់ ៕