មន្ត្រីពីសេតវិមាន បាននិយាយ នៅថ្ងៃអង្គារ (ទី១៨ ខែកក្កដា) នេះ ថា នាវាមុជទឹកដែលមានបំពាក់ក្បាលគ្រាប់នុយក្លេអ៊ែររបស់សហរដ្ឋអាមេរិក កំពុងធ្វើទស្សនកិច្ច នៅកំពង់ផែ ក្នុងទីក្រុងប៊ូសាន (Busan) ជាលើកដំបូង ក្នុងរយៈពេលជាច្រើនទសវត្សរ៍ ដែលការចូលចតនេះ គឺដើម្បីបង្ហាញពីការប្តេជ្ញាចិត្តតាមសន្ធិសញ្ញាការពារសម្ព័ន្ធមិត្តរបស់អាមេរិក ចំពោះប្រទេសកូរ៉េខាងត្បូង។

អ្នកសម្របសម្រួលក្រុមប្រឹក្សាសន្តិសុខជាតិសហរដ្ឋអាមេរិក សម្រាប់កិច្ចការឥណ្ឌូ-ប៉ាស៊ីហ្វិក លោក Kurt Campbell បានធ្វើការកត់សម្គាល់ទៅកាន់អ្នកសារព័ត៌មាន នៅការិយាល័យប្រធានាធិបតី បន្ទាប់ពីធ្វើជាសហប្រធាននៃសម័យប្រជុំដំបូងរបស់ក្រុមប្រឹក្សាយោបល់នុយក្លេអ៊ែរ ដែលទទួលបានការយល់ព្រមដោយប្រធានាធិបតីកូរ៉េខាងត្បូង លោក Yoon Suk Yeol និងប្រធានាធិបតីសហរដ្ឋអាមេរិក Joe Biden កាលពីខែមេសា។

ដោយនិយាយបន្ថែមពីដំណើរទស្សនកិច្ចលើកដំបូងរបស់នាវាមុជទឹកនុយក្លេអ៊ែរសហរដ្ឋអាមេរិក ក្នុងរយៈពេលជាច្រើនទសវត្សរ៍នោះ លោក Campbell បានប្រាប់ថា៖ «ដូចដែលយើងនិយាយហើយ នាវាមុជទឹកនុយក្លេអ៊ែររបស់សហរដ្ឋអាមេរិក កំពុងឈប់ចតនៅកំពង់ផែ ក្នុងទីក្រុងប៊ូសាន (Busan) ថ្ងៃនេះ»។

សហរដ្ឋអាមេរិកបានសន្យាថា នឹងបញ្ជូននាវាមុជទឹកបំពាក់មីស៊ីលបាលីស្ទិកមានក្បាលគ្រាប់នុយក្លេអ៊ែរទៅកាន់កូរ៉េខាងត្បូង នៅក្នុងសេចក្តីថ្លែងការណ៍របស់ទីក្រុងវ៉ាស៊ីនតោន ដែលត្រូវបានអនុម័តដោយលោក Yoon និងលោក Biden អំឡុងកិច្ចប្រជុំកំពូលរបស់ថ្នាក់ដឹកនាំទាំងពីរ នៅទីក្រុងវ៉ាស៊ីនតោន កាលពីខែមេសា ដើម្បីធ្វើឲ្យប្រសើរឡើងនូវភាពជាក់ស្ដែងទៀងទាត់នៃយុទ្ធុបករណ៍ជាយុទ្ធសាស្ត្រ នៅឧបទ្វីបកូរ៉េ៕