កូរ៉េខាងជើង ៖ ទីបញ្ជាការអង្គការសហប្រជាជាតិបាននិយាយថា បុរសជនជាតិអាមេរិកម្នាក់ដែលបាន​ឆ្លងព្រំដែនពីកូរ៉េខាងត្បូង​ទៅកាន់ប្រទេសកូរ៉េខាងជើងទំនងជាត្រូវបានឃុំខ្លួន។

ស្ថាប័នដែលស្វែងរកការធានាសន្តិសុខនៅឧបទ្វីបកូរ៉េ បានបង្ហោះនៅលើបណ្ដាញសង្គម Twitter នៅថ្ងៃអង្គារនេះថា ពលរដ្ឋអាមេរិករូបនេះធ្វើដំណើរទៅកាន់ភូមិព្រំដែនកូរ៉េ ហើយបានឆ្លងព្រំដែនចូលទៅក្នុង​ប្រទេសកូរ៉េខាង​ជើងដោយគ្មានការអនុញ្ញាត។

បញ្ជាការអង្គការសហប្រជាជាតិនិយាយថា បច្ចុប្បន្នបុរសរូបនោះត្រូវបានគេជឿថាកំពុងស្ថិត​នៅក្នុងការឃុំឃាំង​របស់កូរ៉េខាងជើង ហើយថាទីបញ្ជាការអង្គការសហប្រជាជាតិកំពុងធ្វើការ​ជាមួយសមភាគីកូរ៉េខាង​ជើងដើម្បី​ដោះស្រាយឧប្បត្តិហេតុនេះ។

បុគ្គលរូបនោះបានចូលរួមក្នុងដំណើរទេសចរណ៍ទៅកាន់តំបន់សន្តិសុខរួម ជាភូមិព្រំដែនក្នុងតំបន់​គ្មានយោធាខណ្ឌចែក​ប្រទេសកូរ៉េទាំងពីរ ដែលមានទាហានរបស់ភាគីទាំងពីរយាមកាមទាំងសងខាងនៅទីនោះ៕