ភ្នំពេញ ៖ ឯកឧត្តម ប្រាជ្ញ ចន្ទ ប្រធាន គណៈកម្មាធិការ ជាតិរៀបចំការបោះឆ្នោត (គ.ជ.ប) បានបញ្ជាក់ថា គ.ជ.ប បានត្រៀមលក្ខណៈរួចរាល់អស់ហើយ សម្រាប់ការបោះឆ្នោត ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ទាំងសម្ភារ ទាំងកម្លាំងការពារសន្តិសុខ សុវត្ថិភាពសណ្តាប់ធ្នាប់សាធារណៈ ដើម្បីឱ្យការបោះឆ្នោត​សម្រេចបានជោគជ័យ។

​ឯកឧត្តម ប្រាជ្ញ ចន្ទ មានប្រសាសន៍បញ្ជាក់បែបនេះក្នុងឱកាសជំនួបពិភាក្សាការងារជាមួយឯកឧត្តម ដេស៊ីរ៉េ នីយ៉ារូហឺរីរ៉ា (Désiré NYARUHIRIRA) ទីប្រឹក្សាពិសេសទទួលបន្ទុកផ្នែក កិច្ចការនយោបាយ និងការទូត​របស់​អគ្គលេខាធិការអង្គការអន្តរជាតិនិយាយភាសាបារាំង (Organisation internationale de la Francophonie “OIF”) ដែលដឹកនាំគណៈប្រតិភូមកសង្កេតមើលការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ ដើម្បីជួបសម្តែងការគួរសម និងពិភាក្សាការងារបោះឆ្នោត។

ជាកិច្ចចាប់ផ្តើម ឯកឧត្តម ប្រាជ្ញ ចន្ទ បានមានមតិស្វាគមន៍ចំពោះ គណៈប្រតិភូដែលបានអញ្ជើញមកដល់ទីស្ដីការ គ.ជ.ប និងដើម្បីពិភាក្សាការងារបោះឆ្នោត។ ជាមួយគ្នានេះ ឯកឧត្តម ដេស៊ីរ៉ នីយ៉ារូហឺរីរ៉ា បានថ្លែងអំណរ​គុណដល់​ឯកឧត្តមប្រធាន គ.ជ.ប ដែលបានចំណាយពេលទទួលជួបគណៈប្រតិភូ OIF ក្នុងខណៈពេលដែល គ.ជ.ប មាន​ការមមាញឹក រៀបចំការបោះឆ្នោត។

ឯកឧត្តមគណៈប្រតិភូបានមានប្រសាសន៍បន្តទៀតថា ប្រទេសកម្ពុជា ជាសមាជិក អង្គការ OIF ដ៏សំខាន់មួយដែរ​ហើយ​វត្តមានរបស់គណៈប្រតិភូ OIF នៅពេលនេះ ដើម្បីបញ្ជាក់ពីការពង្រឹងទំនាក់ទំនងរវាងប្រទេសកម្ពុជាជាមួយ OIF ឱ្យកាន់តែរឹងមាំ។ ឯកឧត្ដមប្រតិភូបន្តថាបេសកកម្មរបស់បតិភូ OIF នាពេលនេះគឺមាន​បំណងជួបជា​មួយស្ថាប័ន​រៀបចំការបោះឆ្នោត គណបក្សនយោបាយ និងអង្គការមិនមែនរដ្ឋាភិបាលមួយចំនួន។ នៅពេលបញ្ចប់បេសកកម្មគណៈប្រតិភូ OIF នឹងចេញជារបាយការណ៍មួយពាក់ព័ន្ធនឹងការបោះឆ្នោតមានទាំង​ការផ្តល់​អនុសាសន៍ និងបង្ហាញពីចំណុចខ្វះខាត ដើម្បីឱ្យភាគីកម្ពុជាបំពេញបន្ថែម។

ឯកឧត្តម ប្រាជ្ញ ចន្ទ បានជម្រាបជូនគណៈប្រតិភូ OIF អំពីប្រវត្តិនៃការ បោះឆ្នោតនៅកម្ពុជាថា នៅឆ្នាំ១៩៩៣ គឺជាការ​បោះឆ្នោតជ្រើសរើសសភាធម្មនុញ្ញ ដែលរៀបចំដោយអាជ្ញាធរបណ្តោះអាសន្ននៃអង្គការ​សហប្រជាជាតិ​ប្រចាំ​នៅកម្ពុជា ហៅកាត់ថា "UNTAC”។ បន្ទាប់មកបានអនុម័តរដ្ឋធម្មនុញ្ញមួយសម្រាប់អនុវត្តនៅប្រទេសកម្ពុជា ហើយ​សភាធម្មនុញ្ញបានក្លាយទៅជាសភាជាតិរួចក៏បានបង្កើតរដ្ឋាភិបាលស្របច្បាប់ និងបង្កើតច្បាប់ជាច្រើនជាបន្តបន្ទាប់ ដើម្បីដំណើរការនិងគ្រប់គ្រងប្រទេសកម្ពុជា។

ចំពោះការបោះឆ្នោតជ្រើសតាំងតំណាងរាស្ត្រ ឯកឧត្តម ប្រាជ្ញ ចន្ទ បានជម្រាបជូនថាការបោះឆ្នោតត្រូវធ្វើ​តាម​ប្រព័ន្ធ​សមាមាត្រដោយយករាជធានី ខេត្ត ជាមណ្ឌលបោះឆ្នោត។ អាសនៈក្នុងរដ្ឋសភាមានចំនួន ១២៥ រីឯមណ្ឌល​បោះឆ្នោត​មានចំនួន ១២៥ នៅតាមរាជធានី ខេត្ត។

ឯកឧត្តម ប្រាជ្ញ ចន្ទ ប្រធាន គ.ជ.ប បានឆ្លើយតបសំណួររបស់គណៈប្រតិភូ និងបានបន្ត ទៀតថា មកទល់ពេលនេះ គ.ជ.ប បាន ត្រៀមលក្ខណៈរួចរាល់អស់ហើយ សម្រាប់ការបោះឆ្នោត ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដា ឆ្នាំ២០២៣ ទាំងសម្ភារ ទាំងកម្លាំងការពារសន្តិសុខ សុវត្ថិភាព សណ្តាប់ធ្នាប់សាធារណៈ ដើម្បីឱ្យការ​បោះឆ្នោតសម្រេចបានជោគជ័យ៕ អត្ថបទ៖ វ៉ន ដារ៉ា