រុស្ស៊ី ៖ លោក Cyril Ramaphosa ប្រធានាធិបតីរបស់ប្រទេសអាហ្រ្វិកខាងត្បូងបាននិយាយថា រាល់ការ​ប៉ុនប៉ង​ចាប់​ខ្លួនលោក វ្ល៉ាឌីមៀ ពូទីន នៅពេលលោកទៅបំពេញទស្សនកិច្ចនៅអាហ្វ្រិកខាងត្បូង នឹងក្លាយ​ជាការប្រកាស​សង្រ្គាមប្រឆាំងនឹងរុស្ស៊ី។

លោកបានធ្វើការព្រមានបែបនេះ មុនពេលកិច្ចប្រជុំអន្តរជាតិមួយធ្វើឡើងនៅទីក្រុង Johannesburg ដែល​ប្រធានាធិបតី​រុស្ស៊ីក៏ត្រូវបានអញ្ជើញឲ្យចូលរួមក្នុងព្រឹត្តការណ៍នោះផងដែរ។

ប៉ុន្តែប្រសិនបើលោក ពូទីន ចាកចេញពីទឹកដីរុស្ស៊ី លោកនឹងត្រូវតុលាការឧក្រិដ្ឋកម្មអន្តរជាតិ (ICC) ចាប់ខ្លួន។ អាហ្រ្វិកខាងត្បូងគឺជាប្រទេសហត្ថលេខីរបស់តុលាការ ICC ហើយដូច្នេះគួរតែជួយក្នុងការចាប់ខ្លួនរបស់លោក ពូទីន។

លោក ពូទីន ត្រូវបានអញ្ជើញទៅប្រទេសអាហ្រ្វិកខាងត្បូងក្នុងខែសីហាខាងមុខនេះ នៅពេលដែលប្រទេស​អាហ្រ្វិកខាងត្បូងនេះធ្វើជាម្ចាស់ផ្ទះនៃកិច្ចប្រជុំកំពូលសម្រាប់សមាជិកនៃបណ្តាប្រទេសធំៗទាំង៥ឬក្រុមទេស Brics ដែលជាអក្សរកាត់សម្រាប់ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង។ ប្លុកនៃសេដ្ឋកិច្ចរីកចម្រើនយ៉ាងឆាប់រហ័សមួយនេះ ត្រូវបានមើលឃើញដោយមនុស្សមួយចំនួនថា ជាជម្រើសមួយជំនួស​ឲ្យក្រុមប្រទេសទាំង៧ (G7) ដែលមានសេដ្ឋកិច្ចជឿនលឿន។

លោកប្រធានាធិបតី Ramaphosa បានបន្ថែមថា អាហ្រ្វិកខាងត្បូង គឺជាប្រទេសមួយក្នុងចំណោមប្រទេស​អាហ្រ្វិកជា​ច្រើនដែលកំពុងជួបពិភាក្សាជាមួយរុស្ស៊ី និងអ៊ុយក្រែន "ជាមួយនឹងទិដ្ឋភាពនៃការបញ្ចប់សង្រ្គាមទាំងស្រុង" ហើយថាការប៉ុនប៉ងចាប់ខ្លួនលោកពូទីននឹងមិនមែនជាផលប្រយោជន៏សម្រាប់បេសកម្មសន្តិភាពនោះទេ៕