ស៊ូដង់ ៖  រដ្ឋអាជ្ញាកំពូលមួយរូប និយាយប្រាប់អង្គការសហប្រជាជាតិ(UN)ថា តុលាការព្រហ្មទណ្ឌអន្តរជាតិ(ICC) បាន​បើក​ការស៊ើបអង្កេតលើការហក់ឡើងខ្ពស់នូវអំពើអរិភាពក្នុងតំបន់ដាហ្វួរ ចាប់តាំងពីពាក់កណ្តាលខែមេសារហូតមក រួមមានទាំងរបាយការណ៍ពីករណីសម្លាប់ ចាប់រំលោភសេពសន្ថវៈ ការលួចដុតផ្ទះសម្បែង ការជម្លៀសខ្លួនជនស៊ីវិល និងឧក្រិដ្ឋកម្មលើកុមារ ។

គួរឲ្យដឹងថា កងទ័ពស៊ូដង់ និងកងកម្លាំងឆ្លើយតបរហ័ស (RSF)បាមប្រយុទ្ធគ្នានៅក្នុងទីក្រុង Khartoum និងតំបន់ផ្សេង​ទៀតនៅក្នុងប្រទេសស៊ូដង់ ចាប់តាំងពីពាក់កណ្តាលខែមេសារហូតមក ដោយសារតែពួកគេចង់​ក្តោបក្តាប់អំណាច​រៀងៗខ្លួន ។

មនុស្សជាង ៣លាននាក់ត្រូវបានរត់ភៀសខ្លួន ក្នុងនោះមនុស្សជាង ៧០ម៉ឺននាក់ បានរត់ភៀសខ្លួនទៅ​កាន់ប្រទេស​ជិតខាង ។ 

អគ្គលេខាធិការ UNលោក Antonio Guterres បាននិយាយកាល​ពីសប្តាហ៍មុនថា ស៊ូដង់ដែលជាប្រទេសធំបំផុតទី ៣របស់អាហ្វ្រិក ស្ថិតនៅលើមាត់ជ្រោះនៃការធ្លាក់ក្នុងសង្រ្គាមស៊ីវិលទ្រង់ទ្រាយពេញ ដែលអាចនឹង​ធ្វើឲ្យអស្ថិរភាព​ដល់តំបន់ធំជាងនេះ ។

ការិយាល័យរបស់រដ្ឋអាជ្ញាធរ Karim Khan បាននិយាយនៅក្នុងរបាយការណ៍ផ្ញើជូនក្រុមប្រឹក្សាសន្តិសុខ UNថា ការិយាល័យរបស់ពួកយើងអាចបញ្ជាក់បានថា ពួកយើងបានបើកការស៊ើបអង្កេតលើករណីពាក់ព័ន្ធនឹង​ឧបទ្ទេវហេតុជាច្រើនកើតឡើងក្នុងបរិបទអរិភាពបច្ចុប្បន្ន ។

របាយការណ៍ បាននិយាយថា ក្រុមរដ្ឋអាជ្ញា ICC កំពុងតាមដានយ៉ាងដិតដល់លើរបាយ​ការណ៍ពីការ​សម្លាប់ក្រៅប្រព័ន្ធតុលាការ ការដុតផ្ទះសម្បែង និងផ្សារ ហើយនិងការលួចទំនិញ នៅតំបន់ Al Geneina, តំបន់ដាហ្វួរខាងលិច ក៏ដូចជាការសម្លាប់ និងការជម្លៀសជនស៊ីវិលនៅតំបន់ដាហ្វួរខាងជើង និងទីទាំងផ្សេងទៀតនៅទូទាំងតំបន់ដាហ្វួរ ។

របាយការណ៍នេះ បន្តថា ពួកគេបានពិនិត្យផងដែរ ការចោទប្រកាន់ពីឧក្រិដ្ឋកម្មផ្លូវភេទ និងយេនឌឺ រួមទាំងករណីចាប់រំលោភសេពសន្ថវៈទ្រង់ទ្រាយធំ និងរបាយការណ៍ពីអំពើហិង្សាប្រឆាំងនឹងកុមារ ៕