ឥណ្ឌា ៖ ទន្លេ Yamuna ដែលហូរឆ្លងរដ្ឋភាគខាងជើង Uttar Pradeshប្រទេសឥណ្ឌា បានឡើងដល់​ជញ្ជាំងចេតិយ​និមិត្តរូប Taj Mahalស្ថិតក្នុងទីក្រុង Agra ក្រោយភ្លៀងធ្លាក់ខ្លាំងឥតឈប់ឈរមួយរយៈពេលកន្លងមកនេះ ធ្វើឲ្យទឹក​ទន្លេឡើងប្រៀបច្រាំង ។

 ប្រជាពលរដ្ឋក្នុងស្រុកនិយាយថា ពួកគេមានព្រួយបារម្ភថា កម្រិតទឹកទន្លេឡើង អាចធ្វើឲ្យខូចខាតដល់ផ្ទះសម្បែង និងរបស់របររបស់ពួកគេ ។

 កម្រិតទឹកទន្លេ Yamunaបានឡើងក្នុងរយៈពេលប៉ុន្មានថ្ងៃចុងក្រោយនេះ ក្រោយភ្លៀងធ្លាក់ខុស​ពីធម្មតានៅ​តំបន់ភាគខាងជើងប្រទេសឥណ្ឌា រួមទាំងនៅរដ្ឋ Uttar Pradesh ដែលទទួលបានភ្លៀងធ្លាក់ធម្មតា ១០៨ភាគរយ ចាប់តាំងពីរដូវវស្សារយៈពេល ៤ខែ ចាប់ផ្តើមកាលពីថ្ងៃទី ១ ខែមិថុនាកន្លងទៅ ។

 យោងតាមគណកម្មការទឹកកណ្តាល(CWC)របស់ប្រទេសឥណ្ឌា បានឲ្យដឹងថា ផ្នែកមួយនៃទន្លេដែលហូរតាមចេតិយ Taj Mahal បានឡើងដល់កម្ពស់ ១៥២ម៉ែត្រ កាលពីល្ងាចថ្ងៃអង្គារ ពោលគឺលើសកម្រិតប្រកាសអាសន្ន ១៥១,៥ម៉ែត្រ ដែលបង្ហាញពីគ្រោះថ្នាក់ដែលអាចកើតមានបាន ។ កម្រិតទឹកដែលគេចាត់ទុកថាគ្រោះថ្នាក់ គឺកម្ពស់ ១៥២,៤ម៉ែត្រ ៕