ឥណ្ឌា៖ កងទ័ពជើងទឹកឥណ្ឌា បាននិយាយថា មនុស្សប្រហែល ១២៧នាក់ កំពុងបាត់ខ្លួននៅថ្ងៃអង្គារនេះ ក្រោយនាវាមួយគ្រឿងរសាត់អណ្តែតនៅជិតឆ្នេរសមុទ្រទីក្រុងម៉ុមបៃ បានលិចអំឡុងជួបព្យុះស៊ីក្លូនតូកតេ ស្របពេលដែលនាវា២គ្រឿង និងឧទ្ធម្ភាកចក្រជាច្រើនគ្រឿង ត្រូវបានដាក់ពង្រាយ ដើម្បីស្វែងរកអ្នកបាត់ខ្លួន។
នាវាមួយគ្រឿង បានដឹកមនុស្ស ២៧៣នាក់ ពេលវាចាប់ផ្តើមរសាត់អណ្តែតកាលពីថ្ងៃចន្ទ ពេលខ្យល់ព្យុះ បោកបក់មកដល់តំបន់ឆ្នេរភាគខាងលិចប្រទេសឥណ្ឌា ធ្វើឲ្យមានរលកធំៗបុកច្រាំងសមុទ្រ។
ក្រសួងការពារជាតិឥណ្ឌា បាននិយាយថា មនុស្ស ១៤៦នាក់ ត្រូវបានជួយសង្គ្រោះចេញពីនាវា ដែលប្រតិបត្តិការដោយក្រុមហ៊ុនប្រេងរដ្ឋ ខណៈប្រតិបត្តិការសង្គ្រោះ បន្តពេញមួយថ្ងៃអង្គារនេះ ជាមួយនឹងស្ថានភាពមិនអំណោយផលនៅក្នុងសមុទ្រ។
គួរឲ្យដឹងថា ព្យុះស៊ីក្លូនតូកតេ ដែលជាព្យុះខ្លាំងក្លាបំផុតបោកបក់មកកាន់តំបន់ ក្នុងរយៈពេលជាច្រើនទសវត្សរ៍កន្លងមកនេះ បានឆក់យកជីវិតមនុស្សជាច្រើននាក់នៅរដ្ឋកេរ៉ាឡា, កាវ ម៉ាហារ៉ាស្ត្រា និងរដ្ឋហ្គូចារ៉ាត និងបានបក់បំប៉ើងផ្ទះសម្បែងប្រជាពលរដ្ឋ រំលើងដើមឈើ និងបង្គោលភ្លើងផងដែរ។
ប្រជាពលរដ្ឋរាប់ម៉ឺននាក់ ត្រូវបានជម្លៀសខ្លួនចេញ ស្របពេលដែលក្រុមអាជ្ញាធរ នៅក្នុងទីក្រុងម៉ុមបៃ បានផ្ទេរអ្នកជំងឺ COVID-19 ប្រហែល៦០០នាក់ ដែលព្យាបាលនៅកណ្តាលវាល ទៅកាន់ទីសុវត្ថិភាព ។
មន្ទីរឧតុនិយមឥណ្ឌា បានរាយការណ៍ថា ព្យុះតូកតេ បានបោកបក់មកដល់ដីគោកនៅរដ្ឋហ្គូចារ៉ាត កាលពីល្ងាចថ្ងៃចន្ទ ជាមួយនឹងសន្ទុះខ្យល់បក់ ១៨៥គ.មក្នុង១ម៉ោង៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
