ភ្នំពេញ៖ កម្លាំងគណៈបញ្ជាការឯកភាពខណ្ឌទួលគោកបានដឹកនាំកម្លាំងសណ្ដាប់ធ្នាប់ខណ្ឌ​ចុះរៀបចំ​សណ្ដាប់ធ្នាប់​តាមបណ្ដោយ​ផ្លូវលេខ ២៣០ និងផ្លូវលេខ ២៣៤ ជាប់ផ្សារនាគមាស ដើម្បីឲ្យមានសោភ័ណភាព​ល្អប្រសើរឡើង​វិញក្រោយ​បងប្អូនអាជីវករ​មួយចំនួនបានយកផ្លូវសាធារណៈ ចតរថយន្ត ម៉ូតូរ៉ឺម៉ក និងតាំងទំនិញ លក់លើផ្លូវ​សាធារណៈបង្កឲ្យមានការកកស្ទះចរាចរណ៍ និងបាត់បង់ សណ្ដាប់ធ្នាប់ បរិស្ថាន អនាម័យ និងសោភ័ណភាព។

ប្រតិបត្តិការនេះបានធ្វើឡើងនៅរសៀលថ្ងៃទី ១៩ ខែកក្កដាឆ្នាំ ២០២៣ តាមបណ្ដោយផ្លូវលេខ ២៣០ និងផ្លូវលេខ ២៣៤ ជាប់ផ្សារនាគមាស សង្កាត់ផ្សារដើមគរ ខណ្ឌទួលគោក រាជធានីភ្នំពេញ។

មន្ត្រីសាលាខណ្ឌទួលគោកបានឲ្យដឹងថា កម្លាំងសណ្ដាប់ធ្នាប់ខណ្ឌតែងតែ​ចុះរៀបចំសណ្ដាប់ធ្នាប់​តាមបណ្ដោយ​ផ្លូវនេះជា​ប្រចាំប៉ុន្តែអាជីវករមួយចំនួនក៏ដូចជាអ្នករត់ម៉ូតូរ៉ឺម៉ក ដឹកទំនិញ និងរថយន្តផ្ទេរបន្លែផ្លែឈើ តែងតែឆ្លៀត​ឪកាសចត បង្កឲ្យមាន​ការកកស្ទះចរាចរណ៍និងបាត់បង់ សណ្ដាប់ធ្នាប់តាមបណ្ដោយផ្លូវនេះ។ បន្ថែមទៀតនោះកម្លាំងសណ្ដាប់ធ្នាប់ខណ្ឌបានបន្តចុះរៀបចំជាប្រចាំ និងបានដាក់កម្លាំងដើម្បីសម្រួល​ចរាចរណ៍និង​កាត់បន្ថយ​ការកក់ស្ទះចរាចរណ៍ផងដែរ។

សូមបញ្ជាក់ផងដែរ ការចុះរៀបចំផ្លូវនេះកម្លាំងសណ្ដាប់ធ្នាប់បានសហការជាមួយនឹងក្រុមហ៊ុនប្រមូលសំរាម​បានបាញ់​ទឹកលាង​សម្អាតផ្លូវចៀសវាង មានក្លិនឆ្អះឆ្អាប បិរស្ថានអនាម័យដល់បងប្អូនអ្នកធ្វើដំណើរ៕ អត្ថបទ៖ កុម្ភៈ