ភ្នំពេញ៖ ឯកឧត្តមកិត្តិនីតិកោសលបណ្ឌិត អ៉ឹម ឈុនលឹម ប្រធានក្រុមប្រឹក្សាធម្មនុញ្ញ បានប្រាប់ដល់អ្នក​សង្កេតការណ៍​អន្តរជាតិថា ការរាប់សន្លឹកឆ្នោតក្នុងថ្ងៃបោះឆ្នោត គឺបង្ហាញពីតម្លាភាព និងយុត្តិធម៌នៃដំណើរបោះឆ្នោត។

ឯកឧត្តមកិត្តិនីតិកោសលបណ្ឌិត អ៉ឹម ឈុនលឹម ប្រធានក្រុមប្រឹក្សាធម្មនុញ្ញ នៅថ្ងៃទី១៨ ខែកក្កដា ឆ្នាំ២០២៣ បាន​អញ្ជើញ​ជួបសន្ទនាជាមួយគណៈប្រតិភូបេសកកម្មសង្កេតការណ៍បោះឆ្នោតហ្វ្រង់កូហ្វូនី (MEF) ដែលដឹកនាំដោយ លោក ដេស៊ីរ៉េ នីយ៉ារ៉ូហ៊ីរីរ៉ា (DÉSIRÉ NYARUHIRIRA) ទីប្រឹក្សាពិសេសទទួលបន្ទុកកិច្ចការនយោបាយ និងការទូត​នៃអគ្គលេខាធិការ​អង្គការអន្តរជាតិ នៃបណ្ដាប្រទេសនិយាយភាសាបារាំង (OIF) រួមជាមួយតំណាង​អង្គការអន្តរជាតិ​នៃ​ប្រទេសប្រើភាសា​បារាំងប្រចាំនៅអាស៊ីនិងប៉ាស៊ីហ្វីក, អ្នកជំនាញការបោះឆ្នោត និងជាមន្ត្រីទំនាក់ទំនងបេសកកម្ម និងបេសក​ជនទទួល​បន្ទុកកិច្ចការនយោបាយ និងប្រជាធិបតេយ្យនៃអង្គការអន្តរជាតិ OIF។

នាឱកាសនោះ ឯកឧត្តម អ៉ឹម ឈុនលឹម ថ្លែងថា ដំណើរវិវត្តនៃការបោះឆ្នោតនៅ​កម្ពុជាចាប់តាំងពីការបោះឆ្នោត​លើកទី១ ឆ្នាំ១៩៩៣ ដែលរៀបចំឡើងដោយអ៊ុនតាក់ ហើយដំណើរវិវត្តនេះកាន់តែប្រសើរឡើងបន្តិចម្ដងៗ ពីការបោះឆ្នោតមួយទៅការបោះឆ្នោតមួយ បើធៀបនឹងការបោះឆ្នោតឆ្នាំ១៩៩៨ រហូតមកដល់បច្ចុប្បន្ន។ ឯកឧត្តម ថ្លែងទៀតថា​ ចំពោះការរាប់សន្លឹកឆ្នោតគឺធ្វើនៅនឹងការិយាល័យបោះឆ្នោតនៅថ្ងៃបោះឆ្នោតតែម្ដង ក្រោមការឃ្លាំ​មើលពីអ្នកសង្កេតការណ៍ជាតិ និងអន្តរជាតិ ព្រមទាំងភ្នាក់ងារគណបក្សនយោបាយសង្កេតការណ៍បោះឆ្នោត ដែលនេះបង្ហាញពីតម្លាភាព និងភាពយុត្តិធម៌ នៃលទ្ធផលបោះឆ្នោត។

ឯកឧត្តម អ៉ឹម ឈុនលឹម បានថ្លែងបន្តថា ក្នុងដំណើរការឃោសនារកសំឡេងឆ្នោត១៨ថ្ងៃ កន្លងមកនេះ ពុំឃើញមាន​ករណីរំលោភច្បាប់ ឬភាពមិនប្រក្រតីគួរឱ្យកត់សម្គាល់ណាមួយកើតឡើងទេ ពោលគឺ ប្រជាពលរដ្ឋ និងអ្នកគាំទ្រ​គណបក្ស​នយោបាយទាំងអស់បានចូលរួមយ៉ាងសកម្ម ដែលនេះបង្ហាញឱ្យឃើញ​អំពីលំហសេរីភាពក្នុង​ប្រទេស​ប្រជាធិបតេយ្យ។

ឯកឧត្តម អ៉ឹម ឈុនលឹម បានផ្ដល់អនុសាសន៍ឱ្យ លោក ដេស៊ីរ៉េ នីយ៉ារ៉ូហ៊ីរីរ៉ា (DÉSIRÉ NYARUHI RIRA) និង​គណៈប្រតិភូអមដំណើរ បន្តសង្កេតការណ៍កិច្ចការបោះឆ្នោតនេះ រហូតដល់ថ្ងៃប្រកាសលទ្ធផលបណ្ដោះអាសន្ន ដើម្បីអាចធ្វើការវាយតម្លៃបានកាន់តែសុក្រិតអំពីដំណើរការបោះឆ្នោតជ្រើសតាំងតំណាងរាស្ត្រ នីតិកាលទី៧​ខាងមុខនេះ។

ឯកឧត្តម អ៉ឹម ឈុនលឹម បានបញ្ជាក់ថា គណបក្សនយោបាយដែលបានចូលរួមក្នុងការបោះឆ្នោតទាំងអស់អាចប្ដឹង​តវ៉ាពីលទ្ធផលបណ្ដោះអាសន្ននៃការបោះឆ្នោតបាន ហើយនីតិវិធីប្ដឹងគឺមានរយៈពេល៧២ម៉ោង បន្ទាប់ពីប្រកាល​លទ្ធផលបណ្ដោះអាសន្ន ដោយគណបក្សនយោបាយមានជម្រើសពីរ គឺអាចប្ដឹងទៅក្រុមប្រឹក្សាធម្មនុញ្ញផ្ទាល់តែម្ដង ឬក៏អាចប្ដឹងទៅ គ.ជ.ប ហើយបន្តមកក្រុមប្រឹក្សាធម្មនុញ្ញក្នុងករណីមិនសុទ្ធចិត្តនឹងការសម្រេចរបស់ គ.ជ .ប។

លោក ដេស៊ីរ៉េ នីយ៉ារ៉ូហ៊ីរីរ៉ា (DÉSIRÉ NYARUHIRIRA) បានលើកឡើងអំពីគោលបំណងនៃជំនួប និងរយៈពេល​បំពេញបេសកកម្មនៅកម្ពុជាដែលមានរយៈពេល ០៩ ថ្ងៃ ចាប់ថ្ងៃទី១៧ ដល់ថ្ងៃទី២៥ ខែកក្កដា ឆ្នាំ២០២៣ ដើម្បីចូល​រួម​សង្កេតមើលដំណើរការបោះឆ្នោតជ្រើសតាំងតំណាងរាស្ត្រនីតិកាលទី ៧ ដែលនឹងប្រព្រឹត្តនៅថ្ងៃអាទិត្យទី២៣ ខែកក្កដា ឆ្នាំ២០២៣ ខាងមុខនេះ៕ ដោយ ៖ ឧត្ដម