មីយ៉ាន់ម៉ា៖ ក្រុមសកម្មជនអះអាងថា មនុស្សជាង ៨០០នាក់ ត្រូវបានសម្លាប់ដោយកងកម្លាំងសន្តិសុខសហភាពមីយ៉ាន់ម៉ា ចាប់តាំងពីរលកបាតុកម្មផ្ទុះឡើងនៅទូទាំងប្រទេស ក្រោយយោធា រឹបអូសអំណាចដោយការធ្វើរដ្ឋប្រហារ កាលពីថ្ងៃទី ០១ ខែកុម្ភៈកន្លងទៅ។
សហភាពមីយ៉ាន់ម៉ា បានស្ថិតនៅក្នុងស្ថានភាពទាល់ច្រក ចាប់តាំងពីកងទ័ពទម្លាក់រដ្ឋាភិបាលឈ្នះឆ្នោតរបស់ម្ចាស់ជយលាភីណូបែលសន្តិភាព លោកស្រី អ៊ុងសាន ស៊ូជី និងឃាត់ខ្លួនមន្ត្រីគណបក្សសម្ព័ន្ធជាតិ ដើម្បីលទ្ធិប្រជាធិបតេយ្យរបស់លោកស្រី។
យោធាបានឆ្លើយតបនឹងបាតុកម្មរបស់ក្រុមអ្នកគាំទ្រលទ្ធិប្រជាធិបតេយ្យ នៅតាមទីក្រុងតូច-ធំជាច្រើនជាមួយនឹងកម្លាំងសម្លាប់ ខណៈដែលមានការប៉ះទង្គិចគ្នាដោយអាវុធផងដែរ រវាងកងទ័ព និងក្រុមឧទ្ទាមជនជាតិដើមភាគតិច ហើយនិងក្រុមជីវពលប្រដាប់អាវុធថ្មី នៅតាមតំបន់ព្រំដែន។
យោងតាមការអះអាង របស់សមាគមន៍ជួយអ្នកទោសនយោបាយ (AAPP) បានឲ្យដឹងថា មកទល់នឹងថ្ងៃចន្ទម្សិលមិញមនុស្ស ៨០២នាក់ ត្រូវបានសម្លាប់អំឡុងវិធានការបង្ក្រាបយ៉ាងចាស់ដៃពីរបបសឹកហោធា មកលើគូប្រជែងរបស់ខ្លួន។
ក្រុម AAPP បានអះអាងទៀតថា ចំនួនមនុស្សស្លាប់ពិតប្រាកដ អាចនឹងខ្ពស់ជាងនេះ។ ពួកគេបានរៀបរាប់លម្អិតពីមនុស្សស្លាប់ ០៦នាក់បន្ថែមទៀត នៅក្នុងទីក្រុងក្នុងរដ្ឋឈីន ហើយនិងទីក្រុងធំម៉ាន់ដាឡេ និងទីក្រុងយ៉ង់ហ្គោន ។
ពួកគេបានបន្តទៀតថា បច្ចុប្បន្នមនុស្ស ៤.១២០នាក់ ត្រូវបានឃាត់ខ្លួន ក្នុងនោះ មនុស្ស ២០នាក់ ត្រូវបានកាត់ទោសប្រហារជីវិតផងដែរ៕ អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
