ភ្នំពេញ៖ ក្រសួងការពារជាតិអះអាងថា ប្រជាពលរដ្ឋជាង ៧២ម៉ឺននាក់ហើយនៅក្នុងខណ្ឌ ៦នៅរាជធានីភ្នំពេញ បានទទួលវ៉ាក់សាំងនៅក្នុងយុទ្ធនាការចាក់ជូនពលរដ្ឋតំបន់ក្រហមជាអាទិភាពរយៈពេល ១៨ថ្ងៃកន្លងមកនេះ។
ក្នុងរបាយការណ៍ចេញនៅល្ងាចថ្ងៃនេះ អនុគណៈកម្មការចំពោះកិច្ចចាក់វ៉ាក់សាំងកូវីដ-១៩ នៃក្រសួងការពារជាតិ បានឱ្យដឹងថា ប្រជាពលរដ្ឋជាង ១ម៉ឺន ៧ពាន់នាក់ទៀត បានទទួលការចាក់វ៉ាក់សាំងនៅថ្ងៃនេះ ដែលនាំឱ្យតួលេខសរុបប្រជាពលរដ្ឋទទួលបានវ៉ាក់សាំងនៅរាជធានីភ្នំពេញ ឡើងដល់ជាង ៧២ម៉ឺននាក់ហើយ។
ក្នុងរយៈពេល ១៨ថ្ងៃនៃយុទ្ធនាការចាក់វ៉ាក់សាំងជូនពលរដ្ឋរស់នៅតំបន់ក្រហមនៅរាជធានីភ្នំពេញ អនុគណៈកម្មការចំពោះកិច្ចការចាក់វ៉ាក់សាំងកូវីដ-១៩ បានផ្ដល់វ៉ាក់សាំងទៅដល់ប្រជាពលរដ្ឋនៅក្នុងខណ្ឌចំនួន ៦ នៅក្នុងចំណោមខណ្ឌទាំង ១៤នៅរាជធានីភ្នំពេញ។
បើតាមរបាយការណ៍ដដែលនេះ ពលរដ្ឋដល់ទៅជាង ១០ម៉ឺននាក់ហើយ បានទទួលការចាក់វ៉ាក់សាំងទាំងពីរដូសរួចរាល់ហើយនៅក្នុងរយៈពេល ១៨ថ្ងៃចុងក្រោយមកនេះ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
