ជនស៊ីវិលរាប់ពាន់នាក់ ត្រូវបានជម្លៀសចេញ បន្ទាប់ពីឃ្លាំងគ្រាប់រំសេវមួយនៅក្នុងតំបន់គ្រីម៉េ ដែលត្រូវបានបញ្ចូលក្នុងឧបសម្ព័ន្ធរបស់រុស្ស៊ី បានឆាបឆេះយ៉ាងសន្ធោសន្ធៅ ដោយបង្កឱ្យមានការផ្ទុះជាបន្តបន្ទាប់។

ប្រព័ន្ធផ្សព្វផ្សាយរុស្ស៊ី បានរាយការណ៍ថា ការផ្ទុះនៅតែត្រូវបានគេឮជាច្រើនម៉ោង បន្ទាប់ពីភ្លើងឆេះ ត្រូវបានរាយការណ៍នៅមូលដ្ឋានយោធាKirovske កាលពីព្រឹកថ្ងៃពុធ។

អាជ្ញាធរមិនបានបញ្ជាក់ពីមូលហេតុនៃការឆាបឆេះនេះទេ ប៉ុន្តែវីដេអូបង្ហាញពីផ្សែងខ្មៅដ៏ខ្មួលខ្មាញហុយឡើងលើអាកាស។

ឧបទ្ទវហេតុនេះ បានកើតឡើងប៉ុន្មានថ្ងៃ បន្ទាប់ពីការផ្ទុះនៅលើស្ពាន Kerchតភ្ជាប់ឧបទ្វីបសមុទ្រខ្មៅទៅកាន់ប្រទេសរុស្ស៊ីដីគោក ដែលវិមានក្រឹមឡាំងបានស្តីបន្ទោសទៅលើប្រទេសអ៊ុយក្រែន។

អាជ្ញាធរមូលដ្ឋាន បាននិយាយថា មនុស្សជាងពីរពាន់នាក់ ត្រូវបានជម្លៀសចេញពីភូមិជុំវិញឃ្លាំងគ្រាប់រំសេវនោះ។ តាមការរាយការណ៍ ពួកគេត្រូវបានផ្តល់ឲ្យនូវជម្រកបណ្តោះអាសន្ន។