ក្រុមការងារនៅក្នុងរដ្ឋធានី Zagrebរបស់ប្រទេសក្រូអាត បានព្យាយាមបោសសម្អាតកម្ទេចកម្ទី ក្រោយព្យុះបោកបក់សម្លាប់មនុស្សយ៉ាងហោច ៣នាក់នៅក្នុងប្រទេសមួយនេះ ។

ក្រសួងមហាផ្ទៃក្រូអាត និយាយនៅលើវែបសាយរបស់ខ្លួនថា បុរស ២នាក់ មកពីទីក្រុង Zagreb និងមនុស្សម្នាក់ទៀត មកពីភូមិ Cernik បានស្លាប់ ពេលដែលដើមឈើបាក់សង្កត់ពីលើពួកគេ ។

ដោយឡែក លោក Ljupka Hitrova គឺជាគ្រូពេទ្យសង្រ្គោះបន្ទាន់ទីក្រុង Zagrebនិយាយប្រាប់ទីភ្នាក់ងារព័ត៌មានក្រូអាតថា បុរស ៣នាក់ បានស្លាប់ដោយសារតែរបួសក្បាលធ្ងន់ធ្ងរ ហើយអ្នករងរបួសផ្សេងទៀត ត្រូវបានរួសរាលបញ្ជូនទៅព្យាបាលបន្ទាន់នៅមន្ទីរពេទ្យ ។ 

ទីភ្នាក់ងារព័ត៌មានក្រូអាត រាយការណ៍ថា ព្យុះបណ្តាលឲ្យកើតមានភាពវឹកវរនៅក្នុងទីក្រុងZagreb ។ ខ្យល់បក់ខ្លាំង បានបក់រំលើងដើមឈើ និងបំប៉ើងដំបូលផ្ទះ ។ ផ្លូវជាច្រើនខ្សែ ត្រូវបានបិទ ហើយមជ្ឈមណ្ឌលទីក្រុង គ្មានចរន្តអគ្គិសនីប្រើប្រាស់នោះទេ ។

 រូបភាពវីដេអូឃ្លីប ផ្តល់ជូនដោយទូរទស្សន៍ឯកជន NOVA TVឃើញក្រុមការងារ ចាប់ផ្តើមយកចេញកម្ទេចកម្ទីពីក្រោមដើមឈើបាក់ធ្វើឲ្យខូចខាតអគារផ្ទះល្វែង ហើយផ្លូវបានស្ទះដោយសារបាក់ដងស្ទួច ។

 ការព្រមានព្យុះកម្រិតពណ៌ក្រហម នៅតែចូលជាធរមានដដែលនៅតំបន់ជុំវិញទីក្រុង Zagreb និងទីក្រុង Karlovac ក្នុងនោះក្រុមអាជ្ញាធរ បានណែនាំឲ្យចៀសវាងការធ្វើដំណើរដែលពុំចាំបាច់ ៕