ឧទ្យានជាតិជ្រលងភ្នំមរណៈ គឺជាចំណុចទាបជាងគេបំផុតនៅអាមេរិកខាងជើង ដែលកម្ពស់ ៨៦ម៉ែត្រពីក្រោមនីវ៉ូសមុទ្រ ។ ទោះបីជាយ៉ាងណាក៏ដោយ នៅទីនេះល្បីល្បាញខ្លាំងណាស់រឿងអាកាសធាតុក្តៅបំផុត ជាពិសេសអំឡុងរដូវក្តៅនៅខែកក្កដា ឆ្នាំនេះ ។

ដោយឆ្លងកាត់សីតុណ្ហភាពក្តៅបំផុតជាលើកដំបូង លោក Vickiដែលជាភ្ញៀវទេសចរមកពីប្រទេសអេស្ប៉ាញ និយាយថា អ្នកមិនអាចគិតដល់ទាល់តែសោះថានៅទីនេះ សីតុណ្ហភាពឡើងដល់ជិត ៥០អង្សាសេ ។

វាគឺជារឿងដែលមិននឹកស្មានដល់សម្រាប់មនុស្សមួយចំនួន ប៉ុន្តែអំឡុងរលកកម្តៅរដូវក្តៅដ៏ក្តៅបំផុត មានមនុស្សខ្លះ បានព្យាយាមឆ្លងកាត់អាកាសធាតុក្តៅខ្លាំងនៅជ្រលងភ្នំមរណៈ ។ 

កាលពីថ្ងៃពុធម្សិលមិញ បុរសវ័យ ៧១ឆ្នាំម្នាក់មកពីទីក្រុង Los Angeles បានបាត់បង់ជីវិតរបស់គាត់ ពេលដើរព្រៃ ។ ឧបទ្ទេវហេតុនេះ បានកើតឡើង ពេលដែលសីតុណ្ហភាពកើនឡើងដល់ ៤៩អង្សាសេ ។ 

បុរសវ័យចំណាស់ម្នាក់នេះ ដែលអត្តសញ្ញាណរបស់លោកពុំត្រូវបានបញ្ចេញឲ្យដឹង បានដួលនៅជិតបន្ទប់ទឹក នៅជ្រលងភ្នំមាស បង្ខំឲ្យភ្ញៀវទេសចរឧទ្យានដើរព្រៃជាមួយគ្នា ទូរស័ព្ទសុំជំនួយសង្រ្គោះបន្ទាន់លេខ ៩១១ នៅវេលាម៉ោង ៣ និង ៤០នាទីរសៀល ម៉ោងក្នុងស្រុក ។ 

សេវាកម្មឧទ្យានជាតិ និងការិយាល័យតម្រួតស្រុក Inyo បានប្រញាប់ប្រញាល់ឆ្លើយតបនឹងការទូរស័ព្ទសង្រ្គោះបន្ទាន់នេះ ប៉ុន្តែជាអកុសល ពួកគេពុំអាចជួយស្រោចស្រង់ជីវិតរបស់គាត់បានឡើយ ។ 

ទោះបីជាយ៉ាងណាក៏ដោយ មូលហេតុពិតប្រាកដនៃការស្លាប់ នៅតែមិនទាន់កំណត់ដឹងនោះទេ ប៉ុន្តែក្រុមអ្នកថែឧទ្យាន សង្ស័យថា រលកកម្តៅ ដើរតួយ៉ាងសំខាន់នៅក្នុងសោកនាដកម្មមួយនេះ ៕