ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយកាលពីថ្ងៃព្រហស្បតិ៍ថា ប្រទេសរុស្ស៊ីត្រូវទទួលខុសត្រូវសម្រាប់វិបត្តិការផ្គត់ផ្គង់ស្បៀងអាហារសកល រយៈពេលប៉ុន្មានថ្ងៃបន្ទាប់ពីវិមានក្រឹមឡាំង បានប្រកាសថាខ្លួន នឹងផ្អាកកិច្ចព្រមព្រៀងសម្រាប់ការនាំចេញគ្រាប់ធញ្ញជាតិអ៊ុយក្រែនតាមរយៈសមុទ្រខ្មៅ។

លោក Borrell បានប្រាប់ក្រុមអ្នកសារព័ត៌មានមុនពេលធ្វើដំណើរទៅកាន់កិច្ចប្រជុំរបស់រដ្ឋមន្ត្រីការបរទេសសហភាពអឺរ៉ុបថា អ្វីដែលយើងបានដឹងរួចមកហើយនោះគឺថា បញ្ហានេះនឹងបង្កើតវិបត្តិស្បៀងអាហារដ៏ធំនៅក្នុងពិភពលោក។

 លោក Borrel បានចោទប្រកាន់រុស្ស៊ី ពីបទវាយប្រហារដោយចេតនាលើទីតាំងស្តុកគ្រាប់ធញ្ញជាតិ នៅក្នុងផែទីក្រុង Odesa ដែលលោកបាននិយាយថា នឹងធ្វើឲ្យវិបត្តិស្បៀងអាហារកាន់តែធ្លាក់ជ្រៅថែមទៀត។