បាល់ទាត់៖ ស្ថានីយទូរទស្សន៍ BTV-News ទិញបានសិទ្ធផ្សាយផ្ទាល់ សម្រាប់ការប្រកួតជម្រុះពានរង្វាន់បាល់ទាត់ពិភពលោក FIFA World Cup Qatar 2022 របស់ក្រុមជម្រើសជាតិកម្ពុជាពីប្រទេសបារ៉ែន នាដើមខែមិថុនាខាងមុខ។
សម្រាប់បេសកកម្មនេះ ក្រុមជម្រើសជាតិកម្ពុជាគឺនៅសល់ ៣ប្រកួតក្នុងដៃដោយនៅថ្ងៃទី៣ ខែមិថុនា កម្ពុជាត្រូវប្រកួតជាមួយក្រុមម្ចាស់ផ្ទះបារ៉ែននាវេលាម៉ោង ១១៖៣០នាទីយប់ (ម៉ោងនៅកម្ពុជា), ថ្ងៃទី៧ ខែមិថុនា កម្ពុជាប្រកួតជាមួយអ៊ីរ៉ាក់នាវេលាម៉ោង ៩៖៣០នាទីយប់ (ម៉ោងនៅកម្ពុជា) និងថ្ងៃទី១១ ខែមិថុនា កម្ពុជាប្រកួតជាមួយអ៊ីរ៉ង់នាវេលាម៉ោង ៩៖៣០នាទីយប់ (ម៉ោងនៅកម្ពុជា)។ ដូច្នេះដោយមានកិច្ចសហការជាមួយសហព័ន្ធកីឡាបាល់ទាត់កម្ពុជា ក៏ដូចជាភាគីបារ៉ែន ស្ថានីយទូរទស្សន៍ BTV-News ផ្សាយផ្ទាល់ការប្រកួតទាំង ០៣ចុងក្រោយរបស់ក្រុមជម្រើសជាតិកម្ពុជា ជូនបងប្អូនអ្នកគាំទ្របានទស្សនាកម្សាន្ត ខណៈក្រុមគោព្រៃកម្ពុជានឹងចាកចេញទៅកាន់ប្រទេសបារ៉ែន នាថ្ងៃទី២៨ ខែឧសភាខាងមុខនេះដើម្បីប្រមូលផ្ដុំហ្វឹកហាត់ និងត្រៀមការប្រកួតនៅទីនោះតែម្ដង។
គួរដឹងថា កម្ពុជាស្ថិតក្នុងពូល C នៃវគ្គជម្រុះពានរង្វាន់ FIFA World Cup Qatar 2022 ជាមួយក្រុមជម្រើសជាតិអ៊ីរ៉ង់, អ៊ីរ៉ាក់, ហុងកុង និងប៉ារ៉ែន ហើយក្រុមនីមួយៗភាគច្រើននៅសល់ ៣ប្រកួតក្នុងដៃ លើកលែងតែអ៊ីរ៉ង់ដែលសល់ ៤ប្រកួតទៀត។ ចំពោះលទ្ធផលបណ្ដោះអាសន្ន អ៊ីរ៉ាក់កំពុងឈរកំពូលតារាងដោយមាន ១១ពិន្ទុក្នុងដៃ, បារ៉ែនឈរលេខ២ មាន ៩ពិន្ទុ, អ៊ីរ៉ង់ឈរលេខ៣ មាន ៦ពិន្ទុ ខណៈហុងកុងឈរលេខ៤ មាន ៥ពិន្ទុ។ ចំណែកកម្ពុជាឈរបាតតារាងមាន ១ពិន្ទុប៉ុណ្ណោះបន្ទាប់ពីឆ្លងកាត់ ៥ប្រកួតស្មើ ១ និងចាញ់ ៤៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
