​បាល់ទាត់៖ សហព័ន្ធ​កីឡាបាល់ទាត់​កម្ពុជា បាន​ប្រកាស​តាំង​តែង​គ្រូ​ជំនួយ​ក្រុម​ជម្រើស​ជាតិ​កម្ពុជា​ចំនួន ២​រូប​កាលពី​ល្ងាច​ថ្ងៃ​ទី​១៨ ខែ​ឧសភា ឆ្នាំ​២០២១ រួមមាន​លោក ភា សុ​ភ័​ក្ដ្រា និង​លោក អ៊ុក សុធី ដើម្បី​ត្រៀម​បំពេញបេសកកម្ម​ជាមួយ​គ្រូបង្វឹក​ជនជាតិ​ជប៉ុន ​លោក Ryu Hirose ក្នុង​ការ​ប្រកួត​វគ្គ​ជម្រុះ​ពានរង្វាន់​បាល់ទាត់​ពិភពលោក FIFA World Cup Qatar 2022 នៅ​ប្រទេស​បា​រ៉ែ​ននា​ដើមខែ​មិថុនា​ខាងមុខ​។​

​នេះ​គឺជា​ការ​ត្រឡប់​ចូលកាន់​តំណែង​ចាស់​ឡើងវិញ​របស់​លោក ភា សុ​ភ័​ក្ដ្រា ដ្បិត​លោក​ធ្លាប់​បំពេញ​ការងារ​នេះ​ជាមួយ​អតីត​គ្រូ​បង្វឹក​ក្រុម​ជម្រើស​ជាតិ​កម្ពុជា Felix G.Dalmas ​មុន​គ្រូ​បង្វឹក​កាន់​សញ្ញាបត្រ A-License រូប​នេះ​បាន​ប្រកាស​លាឈប់​ពី​កៅអី​គ្រូ​ជំនួយ​កាលពី​ខែ​ឧសភា ឆ្នាំ​២០២០ កន្លងទៅ​។ ​ចំណែក​លោក អ៊ុក សុធី វិញ នេះ​គឺជា​លើកដំបូង​ហើយ ដែល​អ្នក​សម្រប​សម្រួល​បច្ចេកទេស​ក្រុម​យុវជន​ថ្នាល​នៃ​ក្លិប​ភ្នំពេញ​ក្រោ​ន​រូប​នេះ បាន​ចូលរួម​ជាមួយ​ក្រុម​ការងា​រ​គ្រូ​បង្វឹក​ក្រុម​ជម្រើស​ជាតិ បន្ទាប់ពី​លោក​បាន​សម្រេចចិត្ត​ចូលនិវត្តន៍​ពី​អាជីព​កីឡាករ​ក្នុង​វ័យ ៣២​ឆ្នាំ​កាលពី​ឆ្នាំ​២០១៩ ក្រោយ​ចំណាយ​ពេល ៩​រដូវ​កាល​ជាមួយ​ក្រុម​សិង្ហ​ក្រហម​ភ្នំពេញ​ក្រោ​ន​។​

​ក្រឡេក​មក​ចាប់អារម្មណ៍​សមាសភាព​កីឡាករ​ក្រុម​ជម្រើស​ជាតិ​កម្ពុជា​វិញ មក​ទល់​ពេល​នេះ សហព័ន្ធ​នៅ​មិនទាន់​ប្រកាស​ផ្លូវ​នោះ​ទេ ខណៈ​ពួកគេ​ត្រូវ​ចាក​ចេញទៅ​បា​រ៉ែ​ននា​ថ្ងៃ​ទី​២៨ ខែ​ឧសភា​ខាងមុខនេះដើម្បី​ធ្វើការ​ហ្វឹកហាត់ និង​ត្រៀម​ការប្រកួត​សេសសល់ ៣​ប្រកួត​ចុងក្រោយនៅ​ក្នុង​ពូ​ល C នៃ​វគ្គ​ជម្រុះ​ពានរង្វាន់​បាល់ទាត់​ពិភពលោកនៅ​ទីនោះ​តែម្ដង។​ ​គួរ​បញ្ជាក់​ថា សម្រាប់​បេសកកម្ម ៣​ប្រកួត​ចុងក្រោយ​របស់​ក្រុម​គោព្រៃ​កម្ពុជា រួម​មាននៅ​ថ្ងៃ​ទី​៣ ខែ​មិថុនា កម្ពុជា​ត្រូវ​ប្រកួត​ជាមួយ​ក្រុម​ម្ចាស់ផ្ទះ​បា​រ៉ែ​ន នា​វេលា​ម៉ោង ១១៖៣០​នាទី​យប់​ (​ម៉ោង​នៅ​កម្ពុជា​), ថ្ងៃ​ទី​៧ ខែ​មិថុនា កម្ពុជា​ប្រកួត​ជាមួយ​អ៊ីរ៉ាក់នា​វេលា​ម៉ោង ៩៖៣០​នាទី​យប់​ (​ម៉ោង​នៅ​កម្ពុជា​) និង​ថ្ងៃ​ទី​១១ ខែ​មិថុនា កម្ពុជា​ប្រកួត​ជាមួយ​អ៊ីរ៉ង់នា​វេលា​ម៉ោង ៩៖៣០​នាទី​យប់ ​(​ម៉ោង​នៅ​កម្ពុជា​) ហើយ​ការប្រកួត​នេះនឹង​មាន​ផ្សាយ​បន្ដ​ផ្ទាល់​លើ​កញ្ចក់​ទូរទស្សន៍ BTV-News៕

​អត្ថបទ៖ លី ឈុន​ឡា