ឯឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ប្រធានក្រុមការងារ ចុះ​ជួយស្រុកពញាក្រែក ខេត្តត្បូងឃ្មុំ និងលោកជំទាវ ថ្ងៃទី២១ ខែកក្កដា ឆ្នាំ២០២៣នេះ បាន​ដឹកនាំ​ក្បួនយុទ្ធនាការឃោសនារកសំឡេងឆ្នោតរបស់គណបក្សប្រជាជនកម្ពុជា សម្រាប់​ការ​បោះឆ្នោត​ជ្រើសតាំង តំណាងរាស្ត្រនីតិកាលទី៧ ដោយមានការចូលរួមពីសមាជិក សមាជិកា​បក្ស​ចំនួន ៥២៦០នាក់ ប្រើ ប្រាស់រថយន្តចំនួន ២៣២គ្រឿង និងម៉ូតូ ព្រមទាំ​ង​មធ្យោបាយ​ធ្វើ​ដំណើរ​ផ្សេងៗ​ទៀត​ជាច្រើនគ្រឿង។ ដោយឡែកសម្រាប់ឯកឧត្តម កែវ ពិសិដ្ឋ អ្នកតំណាងរាស្ត្រ​មណ្ឌល​ត្បូងឃ្មុំ ប្រធានក្រុមការងារចុះ ជួយឃុំពពេល ស្រុកពញាក្រែក និង​លោកជំទាវ​ក៏​បាន​ដឹកនាំ​ក្បួន​យុទ្ធនាការ​ឃោសនានៅក្នុងមូលដ្ឋាន ឃុំពពេលដោយមានអ្នកចូលរួមចំនួន ១៣៥០នាក់ ប្រើ​ប្រាស់​​រថយន្ត​ចំនួន ៦៣គ្រឿង ព្រមទាំងម៉ូតូ និង មធ្យោបាយធ្វើ​ដំណើរ​ផ្សេងៗ​ទៀត​ជា​ច្រើន​ទៀត​។

នៅចំពោះមុខសមាជិក សមាជិកាបក្ស ឯឧត្តម វង សូត បានសម្តែងនូវក្តីមោទនៈចំពោះការចូល រួម​យ៉ាង​សកម្មរបស់បងប្អូននៅក្នុងយុទ្ធនាការឃោសនារកសម្លេងឆ្នោតរយៈពេល ២០ថ្ងៃ​កន្លង​មក​នេះ ហើយថ្ងៃនេះគឺជាថ្ងៃទី២១ និងជាថ្ងៃត្រូវបិទបញ្ចប់យុទ្ធនាការរយៈពេល ២១ថ្ងៃផងដែរ។ ឯក​ឧត្តមក្នុង នាមសម្តេចអគ្គមហាពញាចក្រី ហេង សំរិន ប្រធានរដ្ឋសភា និង​ជា​ប្រធាន​ក្រុម​ការងារ​ចុះ​ជួយខេត្តត្បូង ឃ្មុំបានកត់​សម្គាល់​អំពី​សកម្មភាព​ដ៏ល្អ​កន្លង​មក​របស់​ក្រុម​ការងារ​ចុះ​ជួយនៅ​តាមភូមិ ឃុំ និងស្រុកទូទាំង ខេត្តត្បូងឃ្មុំ ដែលបានខិតខំ​ផ្សព្វផ្សាយ​ពី​គោល​នយោបាយ​ដ៏​ត្រឹម​ត្រូវ​របស់គណបក្សប្រជាជនកម្ពុជា រហូតធ្វើឱ្យបងប្អូនប្រជាពលរដ្ឋនៅក្នុងមូលដ្ឋាន ជា​ពិសេស​អ្នក​ដែលធ្លាប់តែគាំទ្រគណបក្សផ្សេងបែរចូល មករួមរស់ជាមួយគណបក្សប្រជាជនកម្ពុជា ដែល​ជា​គណបក្សមានការទទួលខុសត្រូវខ្ពស់បំផុតចំពោះ អាយុជីវិតប្រទេសជាតិ និងប្រជាជន​កម្ពុជា​។ សម្រាប់ឯកឧត្តម វង សូត ការណ៍ដែលបងប្អូនប្រជាពល រដ្ឋជឿ​ជាក់​មក​លើ​គណបក្ស​ប្រជាជន​កម្ពុជា បោះឆ្នោតជូនគណបក្សប្រជាជនកម្ពុជា គឺជារឿងដ៏ត្រឹមត្រូវ ជាទីបំផុត ព្រោះ​មាន​តែ​គណបក្សប្រជាជនកម្ពុជាទេដែលបានរំដោះប្រទេសជាតិ និងប្រជាជនកម្ពុជា ចេញ​ពី​របប​ប្រល័យ​ពូជ​សាសន៍ ប៉ុល ពត និងបានលះបង់ខ្ពស់បំផុតក្នុងការការពារជាតិ កសាងជាតិឱ្យ មាន​ការ​រីកចំរើន​ដូចសព្វថ្ងៃ។ ដូច្នេះគ្មានអ្វីដែលបងប្អូនម្ចាស់ឆ្នោតត្រូវរារែកក្នុងការសម្រេចចិត្តបោះឆ្នោត ជូនគណបក្ស​ប្រជាជន​កម្ពុជា​ដែលមានលេខរៀងទី១៨ នៅថ្ងៃបោះឆ្នោតទី២៣ កក្កដា ខាងមុខនេះឡើយ ព្រោះ​ថា​ឆ្នោតមួយសន្លឹករបស់បងប្អូនមានតម្លៃធំធេងណាស់សម្រាប់សន្តិភាព និងការអភិវឌ្ឍ។ មានន័យ ថា បោះឆ្នោតជូនគណបក្សប្រជាជនកម្ពុជា គឺដើម្បីរក្សាសុខសន្តិភាព និងបន្ត​ការ​អភិវឌ្ឍ​ជាតិ​ថ្មីៗបន្ថែម ទៀត គឺបន្ថែមពីលើអ្វីៗដែលយើងមានស្រាប់ដូចសព្វថ្ងៃនេះ។ ឯកឧត្តម វង សូត បានអំពាវនាវដល់ សមាជិក សមាជិការបក្ស និងប្រជាពលរដ្ឋទាំងអស់ ត្រូវរក្សា​ភាព​ស្ងប់​ស្ងាត់​១​ថ្ងៃ​មុនថ្ងៃបោះឆ្នោត ហើយ ចំពោះអ្នកមានសិទ្ធិបោះឆ្នោត សូមត្រៀម​លក្ខណៈ​ឱ្យ​បាន​គ្រប់​គ្រាន់ រក្សាសុខភាពឱ្យបានល្អ ជាពិសេស សូម​កុំ​ភ្លេច​យក​ទៅ​ជាមួយ​នូវ​ឯកសារ​នានា​ដែល​ជា​តម្រូវ​ការ​ សម្រាប់ការបោះឆ្នោត និងសូមអញ្ជើញទៅ បោះឆ្នោតឱ្យបានគ្រប់ៗគ្នា និងសូម​បោះឆ្នោត​ជូន​គណបក្សប្រជាជនកម្ពុជាដែលមានរូបសញ្ញាទេវតា បាចផ្កាជា​សម្គាល់​ស្ថិត​នៅ​លេខ​រៀង​ទី១៨ លើសន្លឹកឆ្នោត ដើម្បីរក្សាសុខសន្តិភាព ប្រជាធិបតេយ្យ និង ការអភិវឌ្ឍ និងដើម្បី​បន្ត​គាំទ្រ​បេក្ខភាពសម្តេចតេជោ ហ៊ុន សែន ជានាយករដ្ឋមន្ត្រីអាណត្តិទី៧ និងគាំទ្រ ឯកឧត្តម​បណ្ឌិត ហ៊ុន ម៉ាណែត ជាបេក្ខភាពនាយករដ្ឋមន្ត្រីបន្តវេនដឹកនាំប្រទេសជាតិនាពេលអនាគត។

គួរកត់សំគាល់ថា សម្រាប់យុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ក្នុងរយៈពេល ២១ថ្ងៃនេះ បានប្រព្រឹត្តទៅក្រោមបរិយាកាសល្អប្រសើរ មានសណ្តាប់ធ្នាប់ល្អ ប្រកាន់​យកនូវលទ្ធិ​ប្រជាធិបតេយ្យសេរីពហុបក្ស គ្មានការបង្ខិតបង្ខំ គំរាមកំហែង គ្មានអំពើហិង្សា ធ្វើឲ្យ​ដំណើរការនៃ ការឃោសនាប្រកបដោយរលូន និងអាចទទួលយកបានទាំងអស់គ្នា។ ការបោះឆ្នោតជ្រើសតាំងតំណាងរាស្ត្រ​ នីតិកាលទី៧ នៅថ្ងៃទី២៣ ខែកក្កដា ឆ្នាំ២០២៣ ខាង​មុខ​នេះ​មាន​គណបក្សនយោបាយចូលរួម ប្រកួតប្រជែងចំនួន ១៨គណបក្ស ដើម្បីដណ្តើម​អាសនៈ​រដ្ឋសភា​ចំនួន ១២៥អាសនៈ នៅទូទាំង២៥ រាជធានី/ខេត្ត នៃព្រះរាជាណាចក្រកម្ពុជា៕