រុស្ស៊ី ៖ កាលពីថ្ងៃព្រហស្បតិ៍ (២០ កក្កដា) នាយកទីភ្នាក់ងារស៊ើបការណ៍ចារកម្មណ្តាល (CIA) លោក William Burns បាននិយាយថា ការបរាជ័យរបស់មេដឹកនាំក្រុមទាហានស៊ីឈ្នួល Wagner លោក Yevgeny Prigozhin បានលាតត្រដាង​ពីភាពទន់ខ្សោយទាំងនៅក្នុងប្រព័ន្ធយោធារបស់លោកប្រធានាធិបតី ពូទីន និងយុទ្ធសាស្ត្រសង្គ្រាម​របស់រុស្ស៊ីនៅ​អ៊ុយក្រែន។

ក្នុងអំឡុងពេលសន្ទនាជាមួយលោកស្រី Mary Louise Kelly ដែលជាពិធីករព័ត៌មានរបស់សារព័ត៌មាន NPR នៅក្នុង​វេទិកា​សន្តិសុខ Aspen លោក Burns បាននិយាយថា ទីភ្នាក់ងារCIA និងទីភ្នាក់ងារស៊ើបការណ៍សម្ងាត់ផ្សេងទៀត​កំពុងទាញយកផលប្រយោជន៍ពីភាពមិនពេញចិត្តនាពេលបច្ចុប្បន្ននៅក្នុង និងក្រៅក្រុមឥស្សរជននៅក្នុងប្រទេសរុស្ស៊ី។

ការបះបោរដែលបានបរាជ័យកាលពីថ្ងៃទី ២៣ និង២៤ ខែមិថុនារបស់ក្រុមទាហានស៊ីឈ្នួល Wagner ត្រូវបាន​លោកខាងលិចបកស្រាយថា ជាបញ្ហាប្រឈមចំពោះការគ្រប់គ្រងរបស់លោកប្រធានាធិបតី វ្លាឌីមៀ ពូទីន ដោយបង្ហាញ​ពីភាពតានតឹងនៃសង្រ្គាមអ៊ុយក្រែនលើរដ្ឋរបស់រុស្ស៊ី។ លោក Burns បាននិយាយថា កំណើននៃការដណ្ដើម​បានទឹកដី​បន្ថែម​ទៀតរបស់អ៊ុយក្រែននៅលើសមរភូមិ នឹងធ្វើឱ្យប្រជាជនរុស្ស៊ីកាន់តែច្រើនយកចិត្តទុកដាក់​ចំពោះការរិះគន់​ដ៏ខ្លាំងនៃសង្គ្រាមដែលធ្វើឡើងដោយលោក Prigozhin មុនពេលមានការបះបោរនោះ។

កាលពីថ្ងៃពុធ (១៩ កក្កដា) នៅក្នុងវីដេអូមួយបានបង្ហាញពីលោក Prigozhin ស្វាគមន៍យុទ្ធជន​របស់ខ្លួនទៅកាន់​ប្រទេសបេឡារុស្សដោយប្រាប់ពួកគេថា ពួកគេនឹងមិនចូលរួមក្នុងសង្គ្រាមអ៊ុយក្រែនទៀតទេសម្រាប់ពេលនេះ ប៉ុន្តែបានបញ្ជាឱ្យពួកគេប្រមូលកម្លាំងរបស់ខ្លួនសម្រាប់ទ្វីបអាហ្វ្រិក ខណៈពេលដែលពួកគេ​កំពុងហ្វឹកហាត់កងទ័ព​របស់ប្រទេសបេឡារុស៕