កូឡុំប៊ី ៖ ប្រធានាធិបតីនៃប្រទេសកូឡុំប៊ី និងនីការ៉ាហ្គ័រ បានបង្ហាញពីឆន្ទៈរបស់ពួកគេក្នុង​ការឈានដល់​កិច្ចព្រមព្រៀង​មួយដោយផ្អែកលើសេចក្តីសម្រេចរបស់តុលាការយុត្តិធម៌អន្តរជាតិ (ICJ) កាលពីសប្តាហ៍មុនទាក់ទង​នឹងជម្លោះព្រំដែន​សមុទ្រដែលអូសបន្លាយពេលយូរលើកោះចំនួនបីនៃប្រជុំកោះការ៉ាអ៊ីប។

ប្រធានាធិបតីនីការ៉ាហ្គ័រលោក Daniel Ortega បាននិយាយថា លោកចង់ឱ្យកិច្ចព្រមព្រៀង​នេះរួមបញ្ចូលសេចក្តី​សម្រេច​ឆ្នាំ២០១២ របស់តុលាការ ICJ ដែលបានផ្តល់ឱ្យប្រទេសអាមេរិកកណ្តាលនូវសិទ្ធិសេដ្ឋកិច្ចលើ​ផ្ទៃដី៧៥.០០០គីឡូម៉ែត្រ​ក្រឡា (៨៩.៧០០យ៉ាតក្រឡា) ។

ចាប់តាំងពីដើមសតវត្សរ៍ទី២០មក ប្រទេសនីការ៉ាហ្គ័រ និងកូឡុំប៊ីបានឈ្លោះប្រកែកគ្នាអំពីកម្មសិទ្ធិនៃដែនទឹក​ដែលសម្បូរ​ដោយធនធានរ៉ែ និងមច្ឆជាតិនៅក្នុងសមុទ្រ ការាអ៊ីប ទោះបីជាប្រទេសទាំងពីរមិនមានព្រំដែនគោកជាប់គ្នាក៏ដោយ។

ប្រទេសនីការ៉ាហ្គ័របានស្នើសុំឲ្យតុលាការពិភពលោក ដែលមានទំនាក់ទំនងនឹងអង្គការសហប្រជាជាតិ ឬតុលាការ ICJ ពង្រីកព្រំប្រទល់ដែនសមុទ្រទឹកជ្រៅស្របច្បាប់របស់ខ្លួន ដោយអះអាងថាខ្ពង់រាបបាតសមុទ្ររបស់​ខ្លួននៅក្រោម​សមុទ្រ​នេះមានទំហំលើសពី ២០០ម៉ាយល៍ណត់ (៣៧០គីឡូម៉ែត្រ) ចេញពីឆ្នេរសមុទ្ររបស់ខ្លួន។ ក្រុមចៅក្រម​បាន​រកឃើញ​ថា សិទ្ធិនៅឈូងសមុទ្ររបស់នីការ៉ាហ្គ័រត្រូវបានបង្កើតឡើងកាលពីមុន ហើយបានបដិសេធការអំពាវនាវ​របស់​ប្រទេសនេះ​ក្នុងការទាមទារឲ្យពង្រីកព្រំដែននេះ៕