ប្រទេសកូរ៉េខាងត្បូងកំពុងទប់ទល់នឹងបញ្ហាទឹកជំនន់ដ៏គំហុក និងបំណាក់ដី បង្កឡើងដោយភ្លៀងធ្លាក់ខ្លាំង ដែលបានវាយប្រហារប្រទេសនេះកាលពីចុងសប្តាហ៍មុន ខណៈដែលសំណួរអំពីទំនួលខុសត្រូវ និងប្រតិបត្តិការឆ្លើយតបនៃគ្រោះទឹកជំនន់នេះកំពុងត្រូវបានលើកឡើង។

ប្រធានាធិបតីរបស់ប្រទេស កូរ៉េខាងត្បូង លោក Yoon Suk Yeol បានស្តីបន្ទោសការរៀបចំសង្រ្គោះមិនគ្រប់គ្រាន់ ហើយបានទទួលស្គាល់ថា "ព្រឹត្តិការណ៍អាកាសធាតុដ៏អាក្រក់បែបនេះនឹងក្លាយជារឿងធម្មតាសម្រាប់ប្រទេស" ហើយបានជំរុញឱ្យចាត់វិធានការដើម្បីដោះស្រាយវិបត្តិអាកាសធាតុ ប៉ុន្តែក្រុមសកម្មជនបរិស្ថានជាច្រើនបានចោទសួរពីការប្តេជ្ញាចិត្តរបស់លោកមួយនោះ។

សកម្មជនអាកាសធាតុម្នាក់និយាយថា "យើងបានឃើញម្តងទៀតហើយថា សង្គមមួយនេះមិនមានសុវត្ថិភាពទេដោយសារតែភាពអសកម្មរបស់រដ្ឋាភិបាលក្នុងប្រតិបត្តិការឆ្លើយតបនឹងវិបត្តិអាកាសធាតុ"។ ក្រុមសកម្មជនជាច្រើននិយាយថា ទោះបីជាមានការគំរាមកំហែងកាន់តែខ្លាំងឡើងចំពោះប្រជាជនកូរ៉េខាងត្បូងពីវិបត្តិអាកាសធាតុក៏ដោយ ក៏ដំណោះស្រាយសម្រាប់មូលហេតុនៃបញ្ហានេះមានតិចតួចខ្លាំងណាស់។

បើគិតជាតួលេខ មនុស្សស្លាប់ដោយសារភ្លៀងធ្លាក់ដ៏ខ្លាំងនេះនៅប្រទេស កូរ៉េខាងត្បូង មានចំនួន ៤៦នាក់ មនុស្សបាត់ខ្លួន៤នាក់ មនុស្ស៣៥នាក់រងរបួស និង១៦.០០០នាក់ត្រូវបានជម្លៀសចេញ ព្រមទាំង៥.៥០០នាក់ទៀតបានភៀសខ្លួន។ កន្លែងសាធារណៈជាង ១.០០០កន្លែង និងទីតាំងបេតិកភណ្ឌវប្បធម៌រាប់សិបកន្លែងត្រូវបានខូចខាត។ ផ្ទះសម្បែងរាប់រយខ្នងត្រូវបានបំផ្លាញ ដីស្រែចំការចំនួន ៣០.០០០ហិចតា ត្រូវបានខូចខាត និងបសុសត្វចំនួន៧០០.០០០ក្បាលបានងាប់៕