ភ្នំពេញ ៖ ឯកឧត្តម ម៉ម ប៊ុនហេង សមាជិកគណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុម​ការងារគណបក្សប្រជាជនកម្ពុជា ចុះមូលដ្ឋានខណ្ឌសែនសុខ នៅព្រឹកថ្ងៃទី២១ ខែកក្កដា ឆ្នាំ២០២៣នេះ បានដឹក​នាំថ្នាក់ដឹកនាំសមាជិក សមាជិកាបក្ស ជាង៣,០០០នាក់ ដង្ហែក្បួនបិទយុទ្ធនាការឃោសនាស្វែងរកសំឡេងឆ្នោត ចេញពីមជ្ឈមណ្ឌលសន្និបាត និងពិព័រណ៌កោះពេជ្រ ឆ្ពោះទៅកាន់មូលដ្ឋានខណ្ឌសែនសុខ រាជធានីភ្នំពេញ ដោយមានការចូលរួមពីលោក ម៉ូវ ម៉ានិត ប្រធានគណបក្សប្រជាជនកម្ពុជាខណ្ឌសែនសុខផងដែរ។

​សូមរំលឹកផងដែរថា ក្នុងអំឡុងពេលនៃយុទ្ធនាការឃោសនាបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣ រយៈពេល២០ថ្ងៃកន្លងមកនេះ ឯកឧត្តម ម៉ម ប៊ុនហេង អមដំណើរជាមួយលោកជំទាវ យក់ សម្បតិ្ត រួមនឹងថ្នាក់ដឹកនាំ សមាជិក សមាជិកា បានជួបសំណេះសំណាលសួរទុក្ខបងប្អូនប្រជាពលរដ្ឋ ព្រមទាំងពន្យល់​អំពីគោលនយោបាយរបស់គណបក្សប្រជាជនកម្ពុជា ទាំង៨ចំនុច ដើម្បីការពារ និងលើកស្ទួយផលប្រយោជន៍​របស់ប្រជាជន។ ទន្ទឹមនឹងនោះ ក៏សូមអំពាវនាវដល់បងប្អូនប្រជាពលរដ្ឋទាំងអស់ អញ្ជើញទៅបោះឆ្នោត​ឲ្យបាន​គ្រប់ៗគ្នា នាថ្ងៃទី២៣ ខែកក្កដា ឆ្នាំ២០២៣ខាងមុខនេះ ពិសេសបោះឆ្នោតជូនគណបក្សប្រជាជនកម្ពុជា ដែល​មានលេខរៀងទី១៨ ព្រោះសំឡេងឆ្នោតរស់បងប្អូនប្រជាពលរដ្ឋម្នាក់ៗ ជាអ្នកសម្រេចនូវជោគវាសនាខ្លួនយើងផ្ទាល់ ក្រុមគ្រួសារ និងប្រទេសជាតិ។

នាឱកាសដង្ហែក្បួនបិទយុទ្ធនាការស្វែងរកសំឡេងឆ្នោត សមាជិក សមាជិកា ០៤នាក់ ក្នុងចំណោមជាង៣០០០នាក់ មកពីសង្កាត់ទាំង៦ ក្នុងខណ្ឌសែនសុខ បានបង្ហាញចំណាប់អារម្មណ៍រួមគ្នាថា ថ្ងៃនេះពិតជាមានអារម្មណ៍រំភើប និងសប្បាយរីករាយមែនទែន ដែលមានកិតិ្តយសក្នុងការចូលរួមដង្ហែក្បួនបិទយុទ្ធនាការ​ឃោសនាស្វែង​រក​សម្លេង​ឆ្នោត ដើម្បីគាំទ្រគណបក្សប្រជាជនកម្ពុជា ជាពិសេសបានជួបជុំនូវយុវជនរបស់គណបក្សជាច្រើនលើសលប់ ទន្ទឹមនឹងនោះសមាជិក សមាជិកាទាំងអស់ បានងើបមកតាំងពីម៉ោង៥ទៀបភ្លឺ ដោយសារតែស្រលាញ់ពីការដឹកនាំ​របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ពីព្រោះថា មានតែសម្តេចតេជោ ទេ! ដែលធ្វើឲ្យ​ប្រទេសជាតិមានសុខសន្តិភាព និងការអភិវឌ្ឍន៍ឥតឈប់ឈររហូតមកដល់ពេលនេះ។

សូមបញ្ជាក់ផងដែរថា បោះឆ្នោតជូនគណបក្សប្រជាជនកម្ពុជា គឺដើម្បីផ្តល់ឱកាសឱ្យគណបក្សប្រជាជនកម្ពុជា ដែលជាគណបក្សពោរពេញទៅដោយស្មារតីស្នេហាជាតិ ប្រកបដោយបណ្តុំបញ្ញាជន ដែលមានសមត្ថភាព បទពិសោធន៍ និងទេពកោសល្យខ្ពស់ ក្នុងការដឹកនាំប្រទេស ដើម្បីបន្តរក្សាបាននូវសុខសន្តិភាព ស្ថិរភាព សេរីភាព បូរណភាពទឹកដី ប្រជាធិបតេយ្យ និងបន្តការអភិវឌ្ឍជាតិមាតុភូមិដ៏អស្ចារ្យរបស់យើងឱ្យកាន់តែមាន​ការរីក​ចម្រើន​សម្បូររុងរឿងជាលំដាប់។ មានតែ គណបក្សប្រជាជនកម្ពុជា តែមួយគត់ ដែលជារបស់ប្រជាជន ដោយសារប្រជាជន និងដើម្បីប្រជាជន៕ អត្ថបទ៖ រដ្ឋា