បុគ្គលិកផ្លូវដែកជាង ២០.០០០នាក់ បាននាំគ្នាធ្វើកូដកម្ម កាលពីថ្ងៃព្រហស្បតិ៍ (ទី២០ ខែកក្កដា) នៅចក្រភពអង់គ្លេស ជុំវិញការទាមទារដំឡើងប្រាក់ខែ ការកាត់បន្ថយការងារ និងលក្ខខណ្ឌការងារនានា។

កម្មករមកពីក្រុមហ៊ុនរថភ្លើងចំនួន ១៤ក្រុមហ៊ុន បានចូលរួមនៅក្នុងកូដកម្មដែលរៀបចំដោយសហជីពឯកទេសដឹកជញ្ជូនធំបំផុតរបស់ចក្រភពអង់គ្លេស សហជីពជាតិនៃកម្មករផ្លូវដែក ផ្លូវសមុទ្រ និងដឹកជញ្ជូន (RMT)។

មនុស្សជាច្រើនដែលចូលរួមធ្វើកូដកម្មនេះ បានត្អូញត្អែរថា ការកើនឡើងតម្លៃឥតឈប់ សម្រាប់ផលិតផលសំខាន់ចាំបាច់ នៅចក្រភពអង់គ្លេស បានធ្វើឲ្យមានការលំបាកកាន់តែខ្លាំងឡើងៗដល់បុគ្គលិកក្នុងការចិញ្ចឹមជីវិតប្រចាំថ្ងៃ។

កូដករម្នាក់ឈ្មោះលោក James ដែលមានមុខក្នុងការតវ៉ាជាមួយសហជីព RMT នេះ បាននិយាយថា៖ «អតិផរណាក្នុងរយៈពេលប៉ុន្មានខែចុងក្រោយនេះ ពិតជាឡើងខ្ពស់ទៅៗឥតស្រាកស្រាន្ត។ មនុស្សជាច្រើនក្នុងសហគមន៍កម្មករ កំពុងជួបការលំបាក។ ហើយក្នុងរយៈពេលបីខែចុងក្រោយនេះ ពួកយើងបាន និងកំពុងប្រកាន់គោលជំហរ ដើម្បីព្យាយាម និងផ្លាស់ប្តូរវិធីដែលរដ្ឋាភិបាលកំពុងជិតមានដំណោះស្រាយចំពោះបុគ្គលិក»។

លោក James ក៏បានកត់សម្គាល់ផងដែរថា កម្មករផ្លូវដែកជាច្រើនមិនត្រឹមតែជួបបញ្ហាជាមួយនឹងកង្វល់អំពីបញ្ហាប្រាក់ឈ្នួលប៉ុណ្ណោះទេ ប៉ុន្តែថែមទាំងបារម្ភពីការបាត់បង់ការងាររបស់ពួកគេទាំងអស់គ្នាផងដែរ។

កូដករបានក៏បានបន្ថែមដែរថា ទោះបីជាសមាជិកសហជីពមានអារម្មណ៍សោកស្ដាយដែលការមិនព្រមទៅធ្វើការរបស់ពួកគេ អាចប៉ះពាល់ដល់ធ្វើដំណើររបស់ប្រជាជនទូទៅ ក្នុងរដូវវិស្សមកាលដ៏មមាញឹក ដែលចាប់ផ្តើមពីខែមិថុនា ដល់ខែសីហា ក្នុងទ្វីបអឺរ៉ុបក៏ដោយ ក៏ពួកគេមិនអាចស្វែងរកវិធីផ្សេងទៀតឲ្យល្អជាងនេះ ដើម្បីបង្ហាញពីការមិនពេញចិត្តរបស់ពួកគេបាននោះឡើយ៕