ទូកកានូ៖ កីឡាករ-កីឡាការិនីទូកកានូ-កាយ៉ាក់ និងរ៉ូអ៊ីងនៃក្រុមជម្រើសជាតិកម្ពុជាចំនួន ២៨នាក់កំពុងសម្រុកហ្វឹកហាត់បង្កើនគុណផល ត្រៀមចូលរួមការប្រកួតកីឡាស៊ីហ្គេមលើកទី៣១ នៅប្រទេសវៀតណាមនាខែវិច្ឆិកា ឆ្នាំ២០២១ ខាងមុខ។ នេះបើតាមការបញ្ជាក់របស់លោក គង់ សុភាព គ្រូជំនួយក្រុមជម្រើសជាតិនៃសហព័ន្ធកីឡាទូកកានូ និងរ៉ូអ៊ីងកម្ពុជា។
លោក គង់ សុភាព បានឲ្យដឹងថា បច្ចុប្បន្នក្រុមជម្រើសជាតិសរុប ៣៣នាក់ក្នុងនោះកីឡាករ-កីឡាការិនី ២៨នាក់កំពុងធ្វើស្វ័យហ្វឹកហាត់តាមផ្ទះ ដើម្បីពង្រឹងសមត្ថភាពផង និងគោរពវិធានការប្រយុទ្ធប្រឆាំងជំងឺកូវីដ-១៩ ផង។ ក្រឡេកមកចាប់អារម្មណ៍ការប្រកួតកីឡាស៊ីហ្គេម នៅវៀតណាមចុងឆ្នាំនេះវិញ សហព័ន្ធគ្រោងបញ្ជូនអត្តពលិកចូលរួមប្រកួតលើ ៣ប្រភេទរួមមានកីឡាទូកកានូ ទូកកាយ៉ាក់ និងទូករ៉ូអ៊ីង ហើយបច្ចុប្បន្នកីឡាករលើវិញ្ញាសានីមួយៗ កំពុងពង្រឹងការហ្វឹកហាត់ជាខ្លាំងដើម្បីត្រៀមប្រកួត និងដណ្ដើមលទ្ធផលល្អជូនជាតិ។ គួរបញ្ជាក់ថា ការប្រកួតកីឡាស៊ីហ្គេមលើកទី៣១ នៅប្រទេសវៀតណាម ដែលជាស៊ីហ្គេមយុទ្ធសាស្ត្រឆ្ពោះទៅស៊ីហ្គេមលើកទី៣២ ឆ្នាំ២០២៣ នៅកម្ពុជា គ្រោងប្រកួតចាប់ពីថ្ងៃទី២១ ខែវិច្ឆិការហូតដល់ថ្ងៃទី២ ខែធ្នូ ឆ្នាំ២០២១ ខាងមុខ ដោយម្ចាស់ផ្ទះវៀតណាមបានកំណត់កីឡា ៤០ប្រភេទដាក់ឲ្យប្រកួត ខណៈកម្ពុជាគ្រោងបញ្ជូនអត្តពលិក ៣២ប្រភេទកីឡាចូលរួម ក្នុងនោះក៏មានកីឡាទូកកានូ-កាយ៉ាក់ និងរ៉ូអ៊ីងផងដែរ។
ចំពោះប្រភេទកីឡាទូកទាំង ២ ដែលម្ចាស់ផ្ទះវៀតណាមបានកំណត់ សម្រាប់វិញ្ញាសាកីឡាទូកកានូគឺមានផ្នែកបុរស ៣វិញ្ញាសា និងនារី ៨វិញ្ញាសា។ រីឯប្រភេទកីឡាទូកកាយ៉ាក់មានផ្នែកបុរស ៤វិញ្ញាសា និងនារី ៤វិញ្ញាសា ខណៈប្រភេទកីឡាទូករ៉ូអ៊ីងគឺមានផ្នែកបុរស ៨វិញ្ញាសា និងនារី ៨វិញ្ញាសា។ ប៉ុន្តែសហព័ន្ធកីឡាទូកកានូ និងរ៉ូអ៊ីងកម្ពុជានៅមិនទាន់កំណត់វិញ្ញាសា ដែលត្រូវបញ្ជូនអត្តពលិកចូលរួមប្រកួតនោះទេ៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
