​បាល់ទាត់៖ ​ខ្សែប្រយុទ្ធ Real Madrid, Karim Benzema ត្រូវបាន​កោះហៅ​ចូល​ក្រុម​ជំរើសជាតិ​បារាំង​វិញ​ ដើម្បី​ចូលរួម​ការប្រកួត​ជើងឯក​ទ្វីបអឺរ៉ុប Euro ២០២០ បន្ទាប់ពី​អវត្តមាន​ពី​ក្រុម​ជំរើសជាតិ​បារាំង ៦ឆ្នាំ​។ ​Karim Benzema មិនបាន​លេង​អោយ​ក្រុម​ជំរើសជាតិ​បារាំង​តាំងពី​ឆ្នាំ២០១៥ បន្ទាប់ពី​ពាក់ព័ន្ធ​នឹង​រឿងអាស្រូវ គំរាម​ទំលាយ​វីដេអូ​អាសអាភាស​ជំរិត​ទារ​យកប្រាក់ ​ពី​អតីត​មិត្ត​រួម​ក្រុម​បារាំង Mathieu Valbuena​។

​​ក្រោយមក Benzema បាន​អវត្តមាន​ពី​ក្រុម​បារាំង​នៅ Euro ២០១៦ និង World Cup ២០១៨ ដោយសារ​បញ្ហា​នេះ​។ នៅ​ខែមករា​ ឆ្នាំ២០២១ ព្រះរាជអាជ្ញា​បារាំង​បានប្រកាសថា Benzema នឹង​ប្រឈមមុខ​នឹង​ការកាត់ក្តី ​ក្រោយ​ត្រូវបាន​គេ​ចោទប្រកាន់​ពីបទ​បង់ប្រាក់​ឱ្យ​បុគ្គល ​ដើម្បី​ជំរិត​ទារប្រាក់​ពី​ខ្សែបម្រើ​ Mathieu Valbuena​ អាយុ​ ៣៦​ឆ្នាំ​ដោយ​គំរាម​ធ្វើឱ្យបែកធ្លាយ​ខ្សែអាត់​វីដេអូ​រួមភេទ​ជា​សាធារណៈ​នៅ​ឆ្នាំ​២០១៥​ ប៉ុន្តែ​ខ្សែប្រយុទ្ធ​រូបនេះ​អះអាងថា ​មន្ត្រី​ប៉ូលីស​បាន​ប្រើ​វិធី​មិន​ស្មោះត្រង់ ​ដើម្បី​ទាក់ទាញ​គាត់​ឱ្យ​ស្ថិត​ក្នុង​ស្ថានភាព​។​ ទំរង់​លេង​ដ៏​អស្ចារ្យ​របស់ Benzema នៅ Real Madrid រដូវ​កាល​នេះ​គឺជា​ហេតុ​ផល​ចម្បង​ដែល​កីឡាករ​វ័យ ៣១​ឆ្នាំ​រូប​នេះ​ត្រូវ​បាន​កោះហៅ​ត្រលប់​មកវិញ ​បន្ទាប់ពី​រក​បាន ២៩​គ្រាប់​រដូវ​កាល​នេះ​អោយ Real Madrid​។​

​រំលឹក​ថា Karim Benzema ធ្លាប់​បាន​បង្ហាញខ្លួន​ឲ្យ​ក្រុម​ជំរើស​ជាតិ​បារាំង​សរុប ៨១​លើក​រក​បាន ២៧​គ្រាប់ និង​ប្រកួត​ចុងក្រោយ​បំផុត​ឲ្យ​ក្រុម​បារាំង​គឺ​យកឈ្នះ​អា​មេ​នី ៤-០ ដែល Benzema រក​បាន​ពីរ​គ្រាប់​ម្នាក់ឯង​។ បារាំង​ស្ថិត​ក្នុង​ពូ​ល F ដោយ​នឹង​ត្រូវ​ជួប​ជាមួយ​ក្រុម​ខ្លាំង​ព័រទុយហ្កាល់ អាល្លឺម៉ង់ និង​ហុង​គ្រី​៕

​អត្ថបទ​៖​នាង សុភា​វុ​ធ