ប្រជាជនអ៊ីស្រាអែលរាប់ម៉ឺននាក់ បានដើរដង្ហែក្បួនចូលទៅក្នុងទីក្រុងហ្សេរុយសាឡឹម (Jerusalem) ហើយអ្នកតវ៉ាជាច្រើនទៀត បានចេញមកបង្ហាញខ្លួន នៅទីក្រុងតែលអាវីវ (Tel Aviv) ដែលជាការ​បង្ហាញកម្លាំងនៅនាទីចុងក្រោយ ដើម្បីរារាំងផែនការកែប្រែប្រព័ន្ធតុលាការដ៏​ចម្រូងចម្រាស​របស់នាយករដ្ឋមន្ត្រី លោក Benjamin Netanyahu។

បាតុកម្ម កាលពីថ្ងៃសៅរ៍ (ទី២២ ខែកក្កដា) បានកើតឡើងនៅពេលដែលអតីតប្រធានសន្តិសុខ​របស់អ៊ីស្រាអែល​ជាង ១០០នាក់ បានចុះហត្ថលេខាក្នុងលិខិតមួយផ្ញើទៅតវ៉ាឲ្យលោក Netanyahu បញ្ឈប់សំណើច្បាប់នេះ ហើយកម្លាំងយោធាបម្រុងរាប់ពាន់នាក់បន្ថែមទៀត បាននិយាយថា ពួកគេនឹងលែងរាយការណ៍ពីកាតព្វកិច្ច ដើម្បីជាការជំទាស់នឹងផែនការនេះ។

សភាអ៊ីស្រាអែល ឬ Knesset គ្រោងនឹងធ្វើការបោះឆ្នោតចុងក្រោយ ​នៅថ្ងៃអាទិត្យ (ទី២៣ ខែកក្កដា) នេះ និងថ្ងៃចន្ទ (ទី២៤ ខែកក្កដា) ស្អែកនេះ លើសំណើច្បាប់មួយ ដើម្បីកំណត់អំណាចរបស់​តុលាការ​កំពូល ដែលតែងចាត់ទុកជាមោឃៈនូវការសម្រេចនានារបស់រដ្ឋាភិបាល ឬរបស់​ថ្នាក់រដ្ឋមន្ត្រី ដោយការធ្វើបែបនេះ រដ្ឋាភិបាលចាត់ទុកថា ​ជាការសម្រេច«មិនសមហេតុផល»។

ក្រុមអ្នករិះគន់ចាត់ទុកសំណើច្បាប់នេះថា ​ជាការគំរាមកំហែងដល់​លទ្ធិប្រជាធិបតេយ្យរបស់​អ៊ីស្រាអែល។ តែទោះបីជាមានការតវ៉ារយៈពេល ៧ខែក៏ដោយ ​ក៏លោក Netanyahu បាន​បន្ថែមការប្តេជ្ញាចិត្តទ្វេដងលើសេចក្ដីព្រាងច្បាប់នេះ ​ខណៈដែលរូបលោកបានចេញវីដេអូមួយ នាព្រឹកថ្ងៃអាទិត្យនេះ ដែលប្រកាសថា លោកនឹងត្រូវសម្រាកនៅមន្ទីរពេទ្យដើម្បី​ទទួល​បែបបទ​វេជ្ជសាស្ត្រ ក្នុងការបំពាក់ឧបករណ៍វាស់ចង្វាក់បេះដូង៕