​បាល់ទាត់៖ ​ក្រុម​តោ​ខៀវ Chelsea បាន​ពង្រឹង​តំណែង​បង្ហាញខ្លួន​នៅ​ក្របខណ្ឌ UEFA Champions League រដូវ​កាល​ក្រោយ​ បន្ទាប់ពី​ជ័យជំនះ​ដ៏​មាន​សារសំខាន់​លើ​ក្រុម​ប្រជែង Leicester City សប្តាហ៍​ទី​៣៧ ក្រប​ខណ្ឌ English Premier League យប់មិញ​។

​​បី​ថ្ងៃ​ប៉ុណ្ណោះ​បន្ទាប់ពី​ការប្រកួត​ដែល Leicester City យកឈ្នះ Chelsea ១-០ លើក​ពាន FA Cup នោះ Chelsea ក៏បាន​សងសឹក​មកវិញ​ក្រោម​ក្រសែភ្នែក​ទស្សនិកជន ៨០០០​នាក់​នៅ Stamford Bridge​។​ ​​គ្រាប់​បាល់​បញ្ចូល​ទី​របស់ Antonio Rudiger​ និង​បាល់ ១១​ម៉ែត្រ​របស់ Jorginho​ ធ្វើអោយ​ក្រុម​របស់លោក Thomas Tuchel ​ទទួលបាន ៣​ពិន្ទុ​ដ៏​មាន​សារសំខាន់​ បើ​ទោះ​ជា Leicester City តប​បាន ១​គ្រាប់​ដោយ Kelechi Iheanacho​។​ ​​ជ័យជំនះ​នេះ​ធ្វើអោយ Chelsea ឡើងឈរ​ពីលើ Leicester City វិញ​ឈរ​លេខ៣ មាន ៦៧ពិន្ទុ​ពីលើ Leicester ១ពិន្ទុ​។

​​Liverpool ដែល​កំពុង​ឈរ​លេខ ៥ ប្រសិន​ឈ្នះ​នៅ​ទឹកដី Burnley ​យប់​នេះ​នឹងធ្វើ​អោយ​ក្រុម​របស់លោក Jurgen Klopp​ ឡើងមក​លេខ៤ វិញ​ឯ Leicester City ត្រូវ​ធ្លាក់​ទៅ​លេខ ៥ វិញ​។ ​​លទ្ធផល​ផ្សេងទៀត​យប់មិញ Manchester United ស្មើ Fulham ១-១ ក្នុង​ទឹកដី​ខ្លួនឯង​ដោយ​គ្រាប់​បាល់​របស់ Edinson Cavani ​និង Fulham​ ដោយ Joe Bryan​។​ ​​មួយ​ពិន្ទុ​នេះ​ក៏បាន​ធានា​អោយ​ក្រុម​របស់លោក Ole Gunnar Solskjaer ​បញ្ចប់​រដូវ​កាល​ក្នុង​ចំណាត់ថ្នាក់​លេខ ២ ស្របពេល​ក្រុម​ជើងឯក Manchester City យប់មិញ​ចាញ់​នៅ​ទឹកដី Brighton ៣-២ និង Leeds យកឈ្នះ​នៅ​ទឹកដី Southampton ២-០៕

​អត្ថបទ​៖​នាង សុភា​វុ​ធ