​បាល់ទាត់៖ ​អ្នកចាត់ការ​ក្រុម Crystal Palace លោក Roy Hodgson នឹង​ចាក​ចេញពី​ក្លិប​ហើយ​នៅ​ដំណាច់​រដូវ​កាល​នេះ​។ ​អ្នកចាត់ការ​វ័យ ៧៣ឆ្នាំ​រូបនេះ​បាន​និយាយថា នេះ​ជា​ពេលវេលា​សក្តិសម​បំផុត​ក្នុងការ​សំរេចចិត្ត​ចាកចេញ ហើយ​ជា​ពេលវេលា​ដ៏​វិសេស​មួយ​ក្នុង​រយៈពេល ៤ឆ្នាំ​នៅ​កីឡដ្ឋាន Selhurst Park​។

​​លោក Roy Hodgson បានមក​កាន់តំណែង​ដឹកនាំ Crystal Palace នៅ​ឆ្នាំ២០១៧ ខណៈ​លោក​នឹង​ដឹកនាំ​ក្រុមប្រកួត​ចុងក្រោយ ​មុន​ចាកចេញ​នៅ​ថ្ងៃអាទិត្យ​នេះ​នៅ​ទឹកដី Arsenal​។ លោក Roy Hodgson ដែល​បានចាប់ផ្តើម​អាជីព​ជា​កីឡាករ​របស់ខ្លួន​នៅ Crystal Palace នេះ បានមក​ជំនួស​តំណែង​លោក Frank de Boer នៅ​ឆ្នាំ២០១៧ នៅពេលនោះ Crystal Palace ឈរ​នៅ​តំបន់​គ្រោះថ្នាក់​ក្រោយ​ចាញ់ ៤ប្រកួត​ជាប់​គ្នា​ដើមរដូវ​កាល​។ ​ក្រោយមក​លោក Roy Hodgson មកដល់ Crystal Palace បន្ត​ចាញ់ ៣ប្រកួត​ជាប់​គ្នា​ទៀត តែ​ក្រោយមក​លោក​បាន​ដឹកនាំ Crystal Palace ឡើងមក​ដល់​លេខ ១១ ក្រោយ​ចប់​រដូវ​កាល​។​ ​រដូវ​កាល​បន្ត​បន្ទាប់មក Crystal Palace ឈរ​លេខ ១២, លេខ ១៤ និង​បច្ចុប្បន្ន​លេខ ១៣​។

​​លោក Roy Hodgson គឺជា​អ្នកចាត់ការ​បច្ចុប្បន្ន​ដែលមាន​វ័យ​ចំណាស់​បំផុត​នៅ Premier League ដោយ​លោក​បានចាប់ផ្តើម​អាជីព​ជា​អ្នកចាត់ការ​តាំងពី ៤៥ឆ្នាំ មុន​ដឹកនាំ​ក្លិប​ស៊ុយអែត Halmstads​ ពោលគឺ​លោក​បាន​ដឹកនាំ​ក្លិប​ចំនួន ១៦ នៅ ៨ប្រទេស​ដូចជា Inter Milan និង Udinese​ នៅ​ជា​អ៊ីតាលី​ជាដើម ក៏ដូចជា​ធ្លាប់​ដឹកនាំ​ក្រុម​ជំរើសជាតិ​ស្វ៊ី​ស អារ៉ាប់​រួម និង​ហ្វាំ​ង​ឡង់​។ ​លោក​ក៏​ធ្លាប់​ដឹកនាំ​ក្រុម​ជំរើសជាតិ​អង់គ្លេស​ផងដែរ ​មុនពេល Euro ២០១២ មកដល់​ដោយ​អង់គ្លេស​ឡើងដល់​វគ្គ ៨ក្រុម​ចុងក្រោយ ​តែ​ក៏​ធ្លាក់​ត្រឹម​វគ្គ​វិលជុំ​ក្នុង​ពូ​ល​នៅ World Cup ២០១៤ ប្រទេស​ប្រេ​ស៊ី​ល​៕

​អត្ថបទ​៖​នាង សុភា​វុ​ធ