សម្តេចក្រឡាហោម ស ខេង ឧបនាយករដ្ឋមន្រ្តី ដ្ឋមន្រ្តីក្រសួងមហាផ្ទៃ និងជាប្រធាន​គណៈ​បញ្ជាការ​សន្តិសុខអចិន្ត្រៃយ៍សម្រាប់ការបោះឆ្នោត បានផ្ញើរសារលិខិតសរសើរ និង​ថ្លែង​អំណរ​គុណ​ដល់​អាជ្ញាធរមូលដ្ឋាន និងសមត្ថកិច្ច​អនុវត្តន៍​ច្បាប់​គ្រប់​លំដាប់​ថ្នាក់​ទាំងអស់​ដែល​បាន​ខិតខំ​អស់​ពី​កម្លាំង​កាយចិត្ត ក្នុងការសម្រប សម្រួល​ឲ្យ​ដំណើរ​កា​រ​បោះឆ្នោត​ជ្រើស​តាំ​ង​តំ​ណាង​រាស្រ្ត​ នីតិកាល​ទី៧ ឆ្នាំ២០២៣នេះ ប្រព្រឹត្តទៅដោយរលូន និងគ្មានអំពើហិង្សាណាមួយកើតឡើង។

តាមរយៈលិខិតសរសើរ និងថ្លែងអំណរគុណរបស់ប្រមុខក្រសួងមហាផ្ទៃដែលបានចេញនៅថ្ងៃទី ២៤ ខែកក្កដា ឆ្នាំ២០២៣នេះ បានលើកឡើងថា ក្នុង​នាម​គណៈ​បញ្ជាការ​សន្តិសុខ​អចិន្ត្រៃយ៍​ សម្រាប់​ការ​បោះឆ្នោត និងក្នុងនាមសម្តេចផ្ទាល់ សូមថ្លែងអំណរគុណយ៉ាងជ្រាលជ្រៅ និង​សូម​កោត​សរសើរ​ដោយស្មោះចំពោះថ្នាក់ដឹកនាំ សមាជិក អាជ្ញាធរមាន សមត្ថកិច្ច និងកង​កម្លាំង​អនុវត្ត​ច្បាប់​គ្រប់​លំដាប់ថ្នាក់ នៃគណៈបញ្ជាការសន្តិសុខអចិន្ត្រៃយ៍សម្រាប់ការ បោះឆ្នោត ដែល​បាន​ខិតខំ​ប្រឹងប្រែងយកអស់កម្លាំងកាយ និងប្រាជ្ញាស្មារតី បំពេញការងារប្រកបដោយ ការ​យក​ចិត្ត​ទុក​ដាក់ និងការទទួលខុសត្រូវខ្ពស់ ញ៉ាំង​ឱ្យ​ដំណើរ​ការ​រៀបចំ​ការ​បោះ​ឆ្នោត​ជ្រើស​តាំង​តំណាងរាស្ត្រ នីតិកាលទី៧ នៃរដ្ឋសភា បានប្រព្រឹត្តទៅដោយរលូនក្នុងបរិយាកាសសន្តិសុខ សណ្តាប់​ធ្នាប់ ល្អប្រសើរ ប្រកបដោយសុវត្ថិភាព គ្មានការភ័យខ្លាច គ្មានការគំរាមកំហែង និង​គ្មាន​អំពើ​ហិង្សា​។

សម្តេចក្រឡាហោម ស ខេង បាន​បញ្ជាក់​បន្ថែម​ទៀត​ថា​ «ជោគ​ជ័យ​ដ៏​ត្រចះ​ត្រច​ង់​ប្រកប​ដោយ​អត្ថន័យ​នេះ បាននាំមកនូវមោទនភាព និងកិត្យានុភាពថ្មី ជូនជាតិមាតុភូមិយើង ជាពិសេ​ស​បាន​បង្កើត​​នូវ​​ប្រវត្តិសាស្ត្រថ្មីមួយទៀតសម្រាប់កម្ពុជា នៅក្នុងដំណើរការ រៀបចំ​ព្រឹត្តិការណ៍​ជាតិ​របស់​ខ្លួន ដែលពីការបោះឆ្នោតមួយទៅការបោះឆ្នោតមួយ បានឆ្លុះបញ្ចាំងកាន់ តែច្បាស់ពីភាពចាស់ទុំ និង​បទ​ពិសោធន៍ ប្រកបដោយភាពជាម្ចាស់របស់អាជ្ញាធរមានសមត្ថកិច្ចពាក់ព័ន្ធ និង​កង​កម្លាំង​អនុវ​ត្ត​ច្បាប់គ្រប់លំដាប់ថ្នាក់ ។ លទ្ធផលដែលយើងសម្រេចបានយ៉ាងត្រចះត្រចង់នេះមិនត្រឹម ​តែ​ជា​ជោគជ័យថ្មីមួយទៀតក្នុងវិស័យសន្តិសុខសាធារណៈប៉ុណ្ណោះទេ ប៉ុន្តែជោគជ័យនេះ បាន​រួម​ចំណែក យ៉ាងសំខាន់ដែលមិនអាចខ្វះបាន ក្នុងក្របខណ្ឌនៃការលើកកម្ពស់លទ្ធិប្រជាធិបតេយ្យ សេរីពហុបក្ស នៅព្រះរាជាណាចក្រកម្ពុជា»។

សម្តេចក្រឡាហោមបានអះអាងទៀតថា «បរិយាកាសប្រកបដោយភាពអំណោយផល និង​មាន​តម្លៃ​នេះ បានបង្កលក្ខណៈងាយស្រួលជូនប្រជាពលរដ្ឋយើងគ្រប់និន្នាការនយោបាយ បាន​អញ្ជើញ​ទៅ​បោះឆ្នោតយ៉ាងច្រើនកុះករប្រមាណ ៨៤.៥៨% ក្នុងចំណោម​អ្នក​ដែល​បាន​ចុះ​ឈ្មោះ​បោះ​ឆ្នោតសរុបទូទាំងប្រទេស ។ ប្រជាជនយើងគ្រប់ច្រកល្ហក បានអនុវត្ត យ៉ាង​ពេញ​លេញ​នូវ​សិទ្ធិ​ស្វ័យ​សម្រេចរបស់ខ្លួន ក្នុងនាមជាពលរដ្ឋល្អ ស្របតាមគោលការណ៍ នៃលទ្ធិប្រជា ធិបតេយ្យ​សេរី ពហុបក្ស ដូចមានចែង និងត្រូវបានធានាដោយរដ្ឋធម្មនុញ្ញ នៃព្រះរាជាណាចក្រកម្ពុជា»។

ជាមួយគ្នានោះដែរសម្តេចក្រឡាហោម ស ខេង ក៏បានសូមប្រសិទ្ធពរជ័យ សិរីសួស្តី ជ័យមង្គល វិបុល​សុខ បវរមហាប្រសើរគ្រប់ប្រការ ជូនថ្នាក់ដឹកនាំ សមាជិក និងអាជ្ញាធរ​មាន​សមត្ថកិច្ច​ពាក់ព័ន្ធ ព្រមទាំងកងកម្លាំងអនុវត្តច្បាប់គ្រប់លំដាប់ថ្នាក់ នៃគណៈបញ្ជាការសន្តិសុខអចិន្ត្រៃយ៍ សម្រាប់​ការ​បោះឆ្នោត សូមបានប្រកបដោយពុទ្ធពរទាំងបួនប្រការ ដើម្បីប​ន្ត​រួម​ចំណែក​បង្កើត​ស្នាដៃ និងសមិទ្ធផលថ្មីៗបន្ថែមទៀត ជូនជាតិមាតុភូមិជាទីស្នេហារបស់យើងផងដែរ៕ អត្ថបទ៖ បាន ចក់