ភ្នំពេញ ៖ បើយោងតាមការចុះផ្សាយរបស់ឯកឧត្តម ហ៊ុន ម៉ានី តាមប្រព័ន្ធChannel Telegram ផ្លូវការ បានបញ្ជាក់​នៅរសៀលថ្ងៃទី២៤ ខែកក្កដា ឆ្នាំ២០២៣នេះថា ផ្អែកលើលទ្ធផលបណ្តោះអាសន្ន ត្រឹមយប់ថ្ងៃទី២៣ ខែកក្កដា​ម្សិលម៉ិញនេះ យើងអាចសន្និដ្ឋានបានថា គណបក្សប្រជាជនកម្ពុជាទទួលបានអាសនៈច្រើនលើសលុប ដែល​ធានាបាននូវជ័យជម្នះក្នុងការរៀបចំរាជរដ្ឋាភិបាលសម្រាប់នីតិកាលទី៧នៃរដ្ឋសភានេះ។

​ក្នុងបរិយាកាសប្រកបដោយក្តីរំភើបរីករាយនេះ ក្នុងនាមជាបេក្ខជនតំណាងរាស្រ្តមួយរូប ឯកឧត្តម ហ៊ុន ម៉ានី ពិតជាសូមថ្លែងអំណរគុណដ៏ជ្រាលជ្រៅ និងស្មោះស្ម័គ្របំផុត ជូនដល់លោកយាយ លោកតា អ៊ុ ពុក ម៉ែ មាមីង បងប្អូន​ប្រជាពលរដ្ឋកម្ពុជាទាំងអស់ រួមបញ្ចូលទាំងក្នុងក្របខណ្ឌខេត្តកំពង់ស្ពឺ ដែលបានអនុវត្តសិទ្ធិ​នយោបាយ​របស់​ខ្លួន ធ្វើការសម្រេចចិត្តយ៉ាងត្រឹមត្រូវ ក្នុងការផ្តល់ឱកាសឱ្យគណបក្សប្រជាជនកម្ពុជា បន្តបម្រើជាតិ និងប្រជាជន​ក្នុងរយៈ​ពេល ៥ឆ្នាំទៅមុខទៀតនេះ។ លទ្ធផលនៃការបោះឆ្នោតជ្រើសតាំងតំណាងរាស្រ្ត នីតិកាលទី៧នេះ បានឆ្លុះបញ្ចាំង​ពីជំនឿទុកចិត្តឥតងាករេ របស់ប្រជាពលរដ្ឋម្ចាស់ឆ្នោតមកលើកិច្ចខិតខំប្រឹងប្រែង ការលះបង់ និងសមត្ថភាពដឹកនាំ​ប្រកបដោយភាពម្ចាស់ការ ម៉ឺងម៉ាត់ និងចាស់ទុំរបស់គណបក្សប្រជាជនកម្ពុជា ក្នុងរយៈកាលកន្លងមកនេះ។

ក្នុងក្របខ័ណ្ឌនៃក្រុមការងារគណបក្សប្រជាជនកម្ពុជា ចុះជួយខេត្ត ឯកឧត្តម ហ៊ុន ម៉ានី សូមកោតសរសើរ វាយតម្លៃ​ខ្ពស់ និងថ្លែងអំណរគុណ ដល់ឯកឧត្តម លោកជំទាវ អស់លោក លោកស្រី ជាក្រុមការងារគណបក្ស និងមន្រ្តី​គណបក្សគ្រប់ជាន់ថ្នាក់ ក្រោមការដឹកនាំពីសំណាក់ ឯកឧត្តមកិត្តិសេដ្ឋាបណ្ឌិត ឆាយ ថន ប្រធានក្រុមការងារ​គណបក្សប្រជាជនកម្ពុជា ចុះជួយខេត្តកំពង់ស្ពឺ ដែលបានចូលរួមយ៉ាងសកម្ម លះបង់អស់កម្លាំងកាយ ចិត្ត និងធនធាន ដើម្បីបំពេញបេសកកម្មជូនគណបក្សជាបន្តបន្ទាប់មកនេះ។

ជ័យជម្នះដ៏ត្រចះត្រចង់នៃការបោះឆ្នោតជ្រើសតាំងតំណាងរាស្រ្ត នីតិកាលទី៧ ជាពិសេសក្នុងខេត្តកំពង់ស្ពឺ ពិតណាស់​គឺជាការរួមចំណែកយ៉ាងធំធេងពីសមាជិក សមាជិកាក្រុមការងារគ្រប់រូប ក្នុងរយៈកាលកន្លងមកនេះ ដែលទទួលបាន​នូវការផ្តល់នូវទំនុកចិត្ត ជំនឿជាក់ និងក្តីស្រលាញ់ពីសំណាក់ប្រជាពលរដ្ឋក្នុងខេត្ត។ អត្ថបទ ៖ រដ្ឋា