តម្លៃឧស្ម័នធម្មជាតិធ្លាក់ចុះ ប៉ុន្តែសីតុណ្ហភាពកំពុងកើនឡើងខ្ពស់ ហើយតម្លៃប្រើប្រាស់អគ្គិសនីនៅក្នុងគ្រួសារជាច្រើនក៏កើនឡើងផងដែរ។ នៅទូទាំងសហរដ្ឋអាមេរិក កម្មវិធីជំនួយដល់អ្នកស្រុកដែលមានប្រាក់ចំណូលទាបក្នុងការគ្របដណ្តប់លើការចំណាយថាមពលរបស់ពួកគេ ដែលបានបង្កើតឡើងកាលពីរាប់ទសវត្សរ៍មុនជាមួយនឹងបញ្ហានៅរដូវរងា កំពុងជួបការលំបាកក្នុងការបំពេញតម្រូវការដ៏ខ្ពស់នៅក្នុងរដូវក្តៅនេះ។

រដូវរងានៅក្នុងតំបន់ជាច្រើននៃសហរដ្ឋអាមេរិក បានជួយជំរុញការផ្គត់ផ្គង់ឧស្ម័នធម្មជាតិនៅឆ្នាំនេះ ដែលតម្លៃរបស់វាបានធ្លាក់ចុះប្រហែល៦០% ចាប់តាំងពីរដូវក្តៅមុនមក។ ប៉ុន្តែតម្រូវការអគ្គិសនីដ៏ខ្ពស់ក្នុងប៉ុន្មានសប្តាហ៍ថ្មីៗនេះ និងសមត្ថភាពមានកម្រិតនៃថាមពលកកើតឡើងវិញក្នុងការបំពេញចន្លោះខ្វះខាតនោះ បានធ្វើឱ្យការចំណាយសម្រាប់អគ្គិសនីមានការកើនឡើងខ្ពស់។

លោក Mohammed Hamdaoui អនុប្រធានផ្នែកថាមពលកកើតឡើងវិញ និងថាមពលនៅក្រុមហ៊ុនស្រាវជ្រាវ Rystad Energy បាននិយាយថា បញ្ហានោះគឺដោយសារតែរលកកំដៅនៅតែកើនឡើងដែលបណ្ដាឲ្យការប្រើប្រាស់អគ្គិសនីក៏មានកំណើនខ្ពស់ផងដែរ។

សមាគមនាយកជំនួយថាមពលជាតិ (NEADA) បានប៉ាន់ប្រមាណនៅដើមខែនេះថា ថ្លៃចំណាយនៃការប្រើប្រាស់អគ្គិសនីរបស់អតិថិជនអាមេរិកនឹងកើនឡើងជិត ១២% នៅរដូវក្តៅនេះលើសពីឆ្នាំមុន ដោយឈានដល់ជាមធ្យម ៥៧៨ដុល្លារ ដោយកើនឡើងពីចំនួន៥១៧ដុល្លារកាលពីមុន។ ការប្រើប្រាស់អគ្គិសនីត្រូវបានកំណត់ឱ្យកាន់តែតឹងរ៉ឹងនៅក្នុងតំបន់ភាគខាងលិច និងខាងត្បូងកណ្តាល ដែលរួមមានរដ្ឋតិចសាស់ ដោយអ្នកប្រើប្រាស់ត្រូវបានគេរំពឹងថានឹងបង់ប្រាក់ជាមធ្យម ៧០៦ដុល្លារនៅចន្លោះខែមិថុនា និងខែសីហា ដោយកើនឡើងពីចំនួន៦៤២ដុល្លារកាលពីឆ្នាំមុន៕