ប្រព័ន្ធផ្សព្វផ្សាយរដ្ឋ បានរាយការណ៍ថា ប្រទេសកាតា កាលពីថ្ងៃអាទិត្យ (ទី២៣ ខែកក្កដា) បានតែងតាំងឯកអគ្គរដ្ឋទូតប្រចាំនៅអារ៉ាប់រួម (UAE) ឡើងវិញ បន្ទាប់ពីមានជម្លោះការទូតអស់រយៈពេលជាច្រើនឆ្នាំ។

យោងតាមទីភ្នាក់ងារសារព័ត៌មានកាតា បានឲ្យដឹងថា ព្រះមហាក្សត្រ Sheikh Tamim bin Hamad Al-Thani បានតែងតាំងលោក Sultan Salmeen Saeed Al Mansouri ជាឯកអគ្គរដ្ឋទូតវិសាមញ្ញ និងពេញសមត្ថភាពប្រចាំនៅអារ៉ាប់រួម។

កាលពីខែមុន ប្រទេសកាតា និងអារ៉ាប់រួម បានព្រមព្រៀងស្ដារតំណាងការទូត និងបើកស្ថានទូតរបស់ខ្លួនឡើងវិញ។ ក្នុងសេចក្តីថ្លែងការណ៍រួម ប្រទេសជិតខាងឈូងសមុទ្រទាំង២ បានឲ្យដឹងថា ស្ថានទូតកាតានៅអាប៊ូដាប៊ី (Abu Dhabi) និងស្ថានកុងស៊ុល នៅទីក្រុងឌូបៃ (Dubai) ព្រមទាំងស្ថានទូតអារ៉ាប់រួម នៅទីក្រុងដូហា នឹងចាប់ផ្តើមការងារឡើងវិញ នៅថ្ងៃទី១៩ ខែមិថុនា។

អារ៉ាប់រួម រួមជាមួយនឹងអារ៉ាប៊ីសាអូឌីត បារ៉ែន និងអេហ្ស៊ីប បានផ្តាច់ទំនាក់ទំនងការទូតជាមួយប្រទេសកាតា ក្នុងឆ្នាំ២០១៧។ ប៉ុន្តែនៅឆ្នាំ២០២១ ប្រទេសទាំងបួន បានចុះហត្ថលេខាលើកិច្ចព្រមព្រៀងផ្សះផ្សាជាមួយក្រុងដូហា ដើម្បីលុបបំបាត់ភាពប្រេះឆានាពេលកន្លងមក៕