កោះ Corfu និងកោះ Evia បានក្លាយជាទីតាំងចុងក្រោយបង្អស់របស់ប្រទេសក្រិកដែលចេញបញ្ជាជម្លៀស ខណៈប្រទេសនេះកំពុងប្រឈមនឹងចំហេះព្រៃដ៏សាហាវ។ អគ្គិភ័យនៅប្រជុំកោះ Rhodes មុននេះបានបង្ខំមនុស្ស ១៩.០០០នាក់ឱ្យចាកចេញពីផ្ទះសម្បែងរបស់ពួកគេ ជាអ្វីដែលរដ្ឋាភិបាលក្រិកហៅថា ជាការជម្លៀសដ៏ធំបំផុតមិនធ្លាប់មានពីមុនមក ហើយគ្មានអ្នករងរបួសត្រូវបានគេរាយការណ៍នោះទេ។

ដំណើរកម្សាន្តថ្ងៃឈប់សម្រាកជាច្រើនត្រូវបានលុបចោល ដោយក្រុមហ៊ុនអាកាសចរណ៍ EasyJet គ្រោងធ្វើមាតុភូមិនិវត្តន៍ជើងហោះហើរចំនួន២ពីប្រជុំកោះ Rhodes ទៅកាន់ចក្រភពអង់គ្លេសនៅថ្ងៃនេះ និងថ្ងៃស្អែកមួយទៀត ហើយក្រុមហ៊ុនអាកាសចរណ៍ Jet2 កំពុងបញ្ជូនយន្តហោះដើម្បីនាំអតិថិជនរបស់ខ្លួនត្រឡប់មកវិញ។

មនុស្សដែលត្រូវបានបង្ខំឱ្យចាកចេញពីសណ្ឋាគារកាលពីចុងសប្តាហ៍ បានសម្រាកនៅព្រលានយន្តហោះ ក៏ដូចជានៅក្នុងសាលកីឡា មជ្ឈមណ្ឌលសន្និសីទ និងនៅតាមផ្លូវ។ ទន្ទឹមនឹងនេះដែរ ក្រុមមន្ត្រីនៅកោះ Corfu បានស្តីបន្ទោសការដុតបំផ្លាញដោយចេតនា ប៉ុន្តែនិយាយថា ចំហេះព្រៃភាគច្រើននៅលើកោះនេះ ត្រូវបានគ្រប់គ្រងហើយ។

ប្រទេសក្រិកបាននឹងកំពុងប្រឈមមុខនឹងកំដៅដ៏ក្តៅខ្លាំងក្លា ជាមួយនឹងសីតុណ្ហភាពលើសពី៤០អង្សាសេ នៅទូទាំងប្រទេស ហើយចំហេះព្រៃនៅក្នុងប្រជុំកោះ Rhodes បានឆាបឆេះអស់រយៈពេលជិតមួយសប្តាហ៍មកហើយ៕