​បាល់ទាត់៖ ​ក្លិប​កីឡា​ដែលមាន​តម្លៃ​ថ្លៃ​បំផុត​ឆ្នាំ​២០២១ ដែល​ចុះផ្សាយ​ដោយ​ទស្សនា​វ​ដ្តី Forbes បាន​បញ្ចេញ​នៅ​ថ្ងៃ​អង្គារ​ម្សិលមិញ​ ដោយ​មិន​មាន​វត្តមាន​ក្លិប​បិសាច​ក្រហម Manchester United ឡើយ​នៅ​លំដាប់​កំពូល​ទាំង ១០​។ ​​Manchester United ឆ្នាំ២០២១ នេះ​បាន​ធ្លាក់​ទៅដល់​លេខ ១១ ដែលមាន​តម្លៃ ៤.២ពាន់​លាន​ដុល្លារ​។

​​ក្រៅពីនោះ​ក្នុងចំណោម​ក្លិប​បាល់ទាត់​មាន​ក្នុង​លំដាប់​កំពូល​ទាំង ១០ ចំនួន ៣ រួមមាន Barcelona លេខ ៤, Real Madrid លេខ ៥ និង Bayern Munich លេខ ១០​។ ​Barcelona ទោះ​ប្រឈម​នឹង​វិបត្តិ Covid-19 ដូចនឹង​ក្លិប​ដទៃទៀត​ដែរ តែ​បាន​ហក់​ឡើង ៤ ចំណាត់ថ្នាក់​ពី​លេខ ៨ ឆ្នាំមុន​មកឈរ​លេខ ៤ ឆ្នាំនេះ​មានតម្លៃ ៤.៧៦ពាន់​លាន​ដុល្លារ ខណៈ​លេខ ៥ Real Madrid មានតម្លៃ ៤.៧៥ពាន់​លាន​ដុល្លារ ឯ Bayern Munich លេខ ១០ មានតម្លៃ ៤.២១ពាន់​លាន​ដុល្លារ​។ ​ក្រៅពី​ក្លិប​បាល់ទាត់​នៅ​លំដាប់​កំពូល​ទាំង ១០ សុទ្ធតែជា​ក្លិប​កីឡា​នៅ​អាមេរិក​ដែល​លេខ ១ គឺ​ក្លិប​បាល់ឱប Dallas Cowboys នៅ​ក្របខណ្ឌ NFL មានតម្លៃ ៥.៧ពាន់​លាន​ដុល្លារ, លេខ ២ ក្លិប​បេ​ស្ប​ល​អាមេរិក New York Yankees, លេខ ៣ ​ក្លិប​បាល់បោះ NBA, New York Knicks, លេខ ៦ ក៏​ជា​ក្លិប​បាល់បោះ NBA ដែរ Golden State Warriors, លេខ ៧ ក្លិប​បាល់បោះ Los Angeles Lakers, លេខ ៨ ក្លិប​បាល់ឱប New England Patriots និង​លេខ ៩ ក៏​ជា​ក្លិប​បាល់ឱប​ដែរ New York Giants​។

​​ដោយឡែក​រាប់​ពី​លេខ ១១ Manchester United មក​សុទ្ធ​តែ​ជា​ក្លិប​បាល់ទាត់​បន្តបន្ទាប់​ដោយ Liverpool លេខ ១២, Manchester City លេខ ១៣, Chelsea លេខ ២៥ , Arsenal លេខ ៣៨​និង Paris Saint Germain​ លេខ ៤៣៕

​អត្ថបទ​៖​នាង សុភា​វុ​ធ