ខ្សែប្រយុទ្ធកូឌីវ័រ Wilfried Zaha បានសំរេចចូលរួមជាមួយក្លិបទួកគី Galatasaray បន្ទាប់ពីផុតកិច្ចសន្យាជាមួយ Crystal Palace។

កីឡាករវ័យ ៣០ ឆ្នាំរូបនេះបានចុះហត្ថលេខារយៈពេល ៣ ឆ្នាំ ជាមួយនឹងប្រាក់ឈ្នួល ៤.៣៥ លានអឺរ៉ូក្នុងមួយឆ្នាំ នេះ​បើ​តាម​ការបញ្ជាក់ពីក្លិបទួកគី។

Zaha បានចាប់ផ្តើមលេងបាល់ដំបូងជាមួយ Crystal Palace តាំងពីវ័យ ១២ ឆ្នាំ និងបាន​ចំណាយ​ពេល​ភាគ​ច្រើន​នៃ​អាជីព​បាល់ទាត់របស់ខ្លួននៅក្លិបអង់គ្លេសមួយនេះ។

សរុបមកទល់បច្ចុប្បន្ននេះ Wilfried Zaha បង្ហាញខ្លួនសរុបបាន ៤៥៨ លើកឱ្យ Crystal Palace ជាកីឡាករទី ៣ ដែល​បង្ហាញ​ខ្លួន​ឱ្យក្លិបច្រើនបំផុត និងស៊ុតបញ្ចូលទីបាន ៩០ គ្រាប់។

Zaha ស៊ុតបញ្ចូលទីបាន ៧ គ្រាប់រដូវកាលមុន មុនពេលរបួសសសៃពួរនៅចុងរដូវកាល។

Wilfried Zaha ត្រូវបានគេដឹងថាមានប្រាក់ឈ្នួលនៅ Crystal Palace ២០ ម៉ឺនផោនក្នុងមួយសប្តាហ៍រដូវកាលមុន ជា​កីឡាករដែលមានប្រាក់ឈ្នួលច្រើនបំផុតក្នុងប្រវត្តិសាស្រ្តក្លិប៕ អត្ថបទ៖នាង សុភាវុធ