Alves Borges បានក្លាយជាកីឡាការិនីដំបូងដែលរកបាន ៣ គ្រាប់ម្នាក់នៅ​ក្នុង​ព្រឹត្តិការណ៍​បាល់​ទាត់​នារី​ជើង​ឯក​ពិភព​លោក​ឆ្នាំ​នេះ ជួយឱ្យក្រុមជើងឯកឆ្នាំ ២០០៧ ប្រេស៊ីលយកឈ្នះប៉ាណាម៉ា ៤-០។

ខ្សែប្រយុទ្ធស្លាបដែលកំពុងប្រកបអាជីពនៅលីគបាល់ទាត់អាមេរិក Alves Borges រកបានពីរគ្រាប់ដំបូងរបស់ខ្លួន នៅវគ្គទី ១ និងមួយគ្រាប់ទៀតនៅវគ្គទី ២ ខណៈ Zaneratto Joao រកបានមួយគ្រាប់ផងដែរឱ្យប្រេស៊ីលឈ្នះប៉ាណាម៉ា ៤-០ សុខ​សប្បាយឡើងឈរលេខ ១ ក្នុងពូល F។

ចំណែកនៅពូល G អ៊ីតាលីក៏រកបាន ៣ ពិន្ទុក្នុងប្រកួតដំបូងរបស់ខ្លួនផងដែរតាមរយៈជ័យជំនះ ១-០ លើអាហ្សង់ទីន។

មួយគ្រាប់ជ័យជំនះរបស់អាហ្សង់ទីនសម្រេចបានដោយខ្សែប្រយុទ្ធ Cristiana Girelli ដែល​ជា​កីឡាការិនី​បម្រុង​ផ្លាស់​ប្តូរ​ចូល​ស៊ុត​បញ្ចូលទីបានសំរេចនៅនាទីទី ៨៧ ទៅហើយ។

នៅក្នុងពូល G នេះ ស៊ុយអែត និងអ៊ីតាលីមាន ៣ ពិន្ទុដូចគ្នា ខណៈអាហ្សង់ទីន និងអាហ្វ្រិកខាងត្បូងមានសូន្យពិន្ទុ។

ក្រឡេកក្រុមជើងឯក ២ សម័យអាល្លឺម៉ង់មិនមានឧបសគ្គឡើយសម្រាប់ប្រកួតដំបូងរបស់ខ្លួននៅក្នុងពូល H នេះ ដោយ​យក​ឈ្នះ​ម៉ារ៉ុកលទ្ធផលធំធេង ៦-០។

ក្នុងចំណោម ៦ គ្រាប់នោះ មានពីរគ្រាប់ភ្លាត់ចូលទីខ្លួនឯងដោយកីឡាការិនីម៉ារ៉ុក ខណៈខ្សែប្រយុទ្ធអាល្លឺម៉ង់ និង​ជា​ប្រធាន​ក្រុម ​Alexandra Popp រកបានពីរគ្រាប់ម្នាក់ឯង។

ម៉ារ៉ុកជាក្រុមមួយក្នុងចំណោម​ ៨ ដែលបង្ហាញខ្លួនដំបូងនៅ World Cup ឆ្នាំនេះ៕ អត្ថបទ៖នាង សុភាវុធ