ប្រព័ន្ធផ្សព្វផ្សាយរដ្ឋរបស់ប្រទេសចិន បានរាយការណ៍ថា អគ្គិភ័យបានបំផ្លាញរូបសំណាកព្រះពុទ្ធដ៏ធំនៅវត្តធំមួយក្នុងខេត្តកាន់ស៊ូ (Gansu) ភាគពាយ័ព្យប្រទេសចិនកាលពីថ្ងៃចន្ទ (២៤ កក្កដា)។

វីដេអូដែលបានចែករំលែកនៅលើប្រព័ន្ធផ្សព្វផ្សាយសង្គម បានបង្ហាញពីរូបសំណាកនៅឯវត្តព្រះពុទ្ធអង្គធំ សានតាន (Shandan) នៃខេត្តកាន់ស៊ូ បានឆាបឆេះកាលពីព្រឹកព្រលឹមថ្ងៃចន្ទ។

ក្រោយពីអគ្គិភ័យបានរលត់ទៅ រូបសំណាកព្រះពុទ្ធហាក់នៅមានសភាពទ្រុឌទ្រោមមួយផ្នែក ប៉ុន្តែសំណង់អារាមជាច្រើនត្រូវបានបំផ្លាញ។

យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក រូបសំណាកដែលបានសាងសង់ក្នុងឆ្នាំ១៩៩៨នោះ ជាការចម្លងពីរូបសំណាកដើមដែលមានអាយុកាលប្រហែល៤២៥ឆ្នាំនៃគ.ស ហើយត្រូវបានខូចខាតក្នុងអំឡុងពេលបដិវត្តន៍វប្បធម៌។

សេចក្តីថ្លែងការណ៍មួយនៅថ្ងៃអង្គារ (២៥ កក្កដា)នេះ ដែលចេញផ្សាយដោយនាយកដ្ឋានផ្សព្វផ្សាយក្នុងស្រុក បានបញ្ជាក់ថា មិនមានអ្នកស្លាប់ដោយសារអគ្គិភ័យនោះទេ ហើយវត្ថុបុរាណវប្បធម៌របស់វត្តនោះនៅតែមិនបានខូចខាត។

សេចក្តីថ្លែងការណ៍នោះមិនបានបញ្ជាក់លម្អិតអំពីលក្ខណៈនៃវត្ថុបុរាណវប្បធម៌នោះទេ ដោយបានបន្ថែមថា មូលហេតុនៃអគ្គិភ័យកំពុងស្ថិតក្នុងការស៊ើបអង្កេតនៅឡើយ៕