យោធាប្រទេសអ៊ីស្រាអែល បាននិយាយថាខ្លួនបានបាញ់សម្លាប់មនុស្ស៣នាក់ តាមដែលចោទប្រកាន់ជាខ្មាន់កាំភ្លើងប៉ាឡេស្ទីន នៅតំបន់គ្រប់គ្រង West Bank នៅភាគខាងជើងនៅថ្ងៃអង្គារនេះ ជាការបង្ហូរឈាមចុងក្រោយនៃការអូសបន្លាយពេលដ៏ហិង្សាបំផុតនៃជម្លោះអ៊ីស្រាអែល-ប៉ាឡេស្ទីន នៅក្នុងរយៈពេលជាច្រើនឆ្នំាមកនេះ។ 

កងកម្លាំងសន្តិសុខអ៊ីស្រាអែល បាននិយាយថា ពួកគេបានបើកការបាញ់រះលើសកម្មប្រយុទ្ធប៉ាឡេស្ទីន ដែលបានបាញ់មកលើពួកគេចេញពីរថយន្ត នៅទីក្រុង Nablus តំបន់ West Bank ជារដ្ឋធានីពាណិជ្ជកម្មរបស់ដែនដីនេះ ហើយជាការផ្តោតសំខាន់លើការវាយឆ្មក់ដែលបានបង្កើនឡើងកាលពីពេលថ្មីៗរបស់យោធាអ៊ីស្រាអែល។

ប្រព័ន្ធផ្សព្វផ្សាយប៉ាឡេស្ទីន បានបរិយាយអំពីការសម្លាប់ខ្មាន់កាំភ្លើងរបស់អ៊ីស្រាអែល ថាជាការពួនស្ទាក់វាយប្រហារ បន្ទាប់ពីការវាយប្រហារដែលបានប៉ុនប៉ងរបស់ក្រុមសកម្មប្រយុទ្ធលើកងកម្លាំងអ៊ីស្រាអែល នៅជិតទីតាំងលំនៅជនជាតិជ្វីហ្វ ដែលអាចមើលឃើញនៅតំបន់ Nablus។

យោធាអ៊ីស្រាអែល និយាយថា ខ្លួនបានរឹបអូស កាំភ្លើងវែងM-16 ចំនួន៣ដើម និងសម្ភារៈដទៃទៀតពីក្នុងរថយន្តរបស់ពួកគេ។ ការប្រយុទ្ធគ្នារវាង អ៊ីស្រាអែល-ប៉ាឡេស្ទីន បានកើនឡើងនៅក្នុងដែនដីនេះ ដែលអ៊ីស្រាអែល ដណ្តើមបានពីប្រទេសហ្ស៊កដានី ក្នុងសង្គ្រាមមជ្ឈឹមបូព៌ាឆ្នាំ១៩៦៧។

ប៉ាឡេស្ទីន ស្វែងទាមទារយកតំបន់គ្រប់គ្រង West Bank រួមជាមួយទីក្រុងហ្សេរុយសាឡឹមខាងកើត និងតំបន់ហ្គាហ្សា ជាក្តីសង្ឃឹមសម្រាប់រដ្ឋនៅពេលអនាគត។