អង្គការសុខភាពពិភពលោក (WHO) បានឲ្យដឹង កាលពីថ្ងៃចន្ទ (ទី២៤ ខែកក្កដា) ថា បុរសវ័យ ២៨ឆ្នាំម្នាក់ ត្រូវបានធ្វើតេស្តវិជ្ជមានវីរុសកូរ៉ូណាបង្កជំងឺផ្លូវដង្ហើមមជ្ឈិមបូព៌ាធ្ងន់ធ្ងរ (MERS-CoV) (មើសខូវី)  នៅក្រុងមួយ ក្នុងទីក្រុងអាប៊ូដាប៊ី (Abu Dhabi) របស់ប្រទេសអារ៉ាប់រួម ជាប់ព្រំដែនប្រទេសអូម៉ង់។

WHO បានឲ្យដឹងនៅក្នុងសេចក្តីថ្លែងការណ៍ថា បុរសម្នាក់នៅទីក្រុង Al Ain ត្រូវបានបញ្ជូនទៅកាន់មន្ទីរពេទ្យកាលពីខែមុន។ សេចក្ដីថ្លែងការណ៍បន្ថែមថា មន្ត្រីសុខាភិបាល បានពិនិត្យមនុស្សចំនួន ១០៨នាក់ដែលមានទំនាក់ទំនងដោយផ្ទាល់ជាមួយបុរសនោះ ប៉ុន្តែរហូតមកដល់ពេលនេះ មិនមានការឆ្លងជំងឺទី២ ណាមួយ បានលេចឡើងនោះទេ។

WHO បានបន្ថែមថា មិនមានសញ្ញាដែលបង្ហាញថា បុរសនោះ បានប៉ះពាល់ជាមួយសត្វអូដ្ឋអារ៉ាប់មួយប្រភេទ ដែលជាភ្នាក់ងារចម្លងជំងឺមួយ ដាច់ដោយឡែកពីជំងឺ COVID-19 នោះទេ។ ជាមួយគ្នានេះ មិនមានការផ្តល់ព័ត៌មានលម្អិតបន្ថែមពីស្ថានភាពបច្ចុប្បន្នរបស់បុរសម្នាក់នេះឡើយ ហើយក្រសួងសុខាភិបាលរបស់អារ៉ាប់រួម ក៏មិនបានឆ្លើយតបភ្លាមៗ ចំពោះសំណើសុំការអត្ថាធិប្បាយអំពីករណីនេះទេ។

យោងតាមតួលេខរបស់ WHO ករណីនៃជំងឺមើសខូវី (MERS-CoV) ដែលអាចបង្កឲ្យមានអាការៈគ្រុនក្តៅ ក្អក និងថប់ដង្ហើម ហើយក្នុងករណីខ្លះ អាចនាំឲ្យមានជំងឺរលាកសួត ត្រូវបានរកឃើញ នៅក្នុងប្រទេសចំនួន ២៧ ចាប់តាំងពីឆ្នាំ២០១២ មក។ ទិន្នន័យបង្ហាញថា ក្នុងរយៈពេលនោះ មានការរាយការណ៍ពីការឆ្លងជំងឺ ២.៦០៥ករណី និងចំនួនអ្នកស្លាប់ជារួមចំនួន ៩៣៦នាក់៕