ភ្នំពេញ ៖ អគារថ្មី នៃមនី្ទរពេទ្យមិត្តភាពខ្មែរ-សូវៀត ដែលកំពុងផ្តល់សេវាកម្មចំនួន៣ផ្នែកធំៗ បានបំពាក់សម្ភារៈ​បរិក្ខារវេជ្ជសាស្រ្តទំនើបចុងក្រោយ មិនទាមទារឲ្យអ្នកជំងឺសម្រាកពេទ្យយូរ និងមិនចាំបាច់វះកាត់ឡើយ។

​អគារថ្មី នៃមនី្ទរពេទ្យមិត្តភាពខ្មែរ-សូវៀត បានផ្តល់សេវាកម្មលើផ្នែកចក្ខុរោគ ផ្នែកប្រព័ន្ធរំលាយអាហារ និងផ្នែក​មនី្ទរពិសោធន៍។ នាយផ្នែកប្រព័ន្ធរំលាយអាហារ លោកវេជ្ជបណ្ឌិត អ៊ុន កែវសិលា នៅអគារថ្មីនេះបានថ្លែងប្រាប់BTV ព័ត៌មាន នាថ្ងៃទី២៥ ខែកក្កដា ឆ្នាំ២០២៣នេះថា ផ្នែកជំងឺប្រព័ន្ធរំលាយអាហារនេះ បានផ្លាស់ប្តូរមកកាន់អគារថ្មី ជាមួយនឹងផ្នែកធំៗទាំងពីរខាងលើផងដែរ ដោយរហូតមកដល់ពេលនេះមានរយៈពេលជាង៦ខែមកហើយ និង​មាន៣៧បន្ទប់ ស្មើនឹង៧១គ្រែ ក្នុងដំណាក់កាលដំបូងនេះ ថ្នាក់ដឹកនាំមនី្ទរពេទ្យបានបើកឲ្យដំណើរ​ការចំនួន៤៥គ្រែ ក្នុងនោះអគារថ្មីនេះ មានផ្តល់សេវាកម្មច្រើន។

​ចំណែកបងប្អូនប្រជាពលរដ្ឋ ដែលមកទទួលសេវាព្យាបាល និងសម្រាកពេទ្យ ពិតជាអរគុណយ៉ាងខ្លាំង​សម្រាប់​សេវាកម្មរបស់មនី្ទរពេទ្យមិត្តភាពខ្មែរ-សូវៀត ដែលបានបម្រើការជូនប្រជាពលរដ្ឋ មិនថាតែរូបគាត់ ឬបងប្អូន​ប្រជាពលរដ្ឋផ្សេងទៀតនោះទេ មើលឃើញផ្ទាល់នឹងភ្នែក ទាំងការផ្តល់សេវាក្នុងមនី្ទរពេទ្យ ទាំងបរិស្ថានជុំវិញអគារ មាន​បរិស្ថានល្អ ទាំងអស់នេះ គឺដោយសារតែប្រទេសយើងមានសុខសន្តិភាព និងមានថ្នាក់ដឹកនាំល្អ ដែលបាន​សាងសង់​មនី្ទរពេទ្យសម្រាប់ប្រជាពលរដ្ឋ មិនថាជាអ្នកមាន ឬជាអ្នកក្រ គឺបានចូលមកសម្រាក​ព្យាបាលជំងឺ​បានដូចៗគ្នា។

​លោកវេជ្ជបណ្ឌិត អ៊ុន កែវសិលា ក៏សូមអំពាវនាវដល់បងប្អូនប្រជាពលរដ្ឋទាំងអស់ អញ្ជើញមកទទួលសេវាកម្មពិនិត្យ ព្យាបាលជំងឺទូទៅ មិនថាតែនៅផ្នែកជំងឺប្រព័ន្ធរំលាយអាហារ ឬផ្នែកផ្សេងៗនោះទេ គឺប្រសិនបើមាន​ឯកសារពេទ្យ​ពីមុន សូមភ្ជាប់មកជាមួយគ្នាផង ដើម្បីក្រុមគ្រូពេទ្យជំនាញងាយស្រួល បានដឹងអំពីស្ថានភាពជំងឺនាពេលកន្លងមក ជាពិសេសប្រជាពលរដ្ឋ ដែលមានប័ណ្ណ ប.ស.ស. ឬមូលនិធិសមធម៌ សូមភ្ជាប់មកជាមួយគ្នា ព្រោះមនី្ទរពេទ្យរដ្ឋ ផ្តល់សេវាកម្មថែទាំសុខភាពជូនបងប្អូនប្រជាពលរដ្ឋ ដូចៗគ្នា។

បើតាមឯកឧត្តមសាស្រ្តាចារ្យ ងី ម៉េង នាយកមនី្ទរពេទ្យមិត្តភាពខ្មែរ-សូវៀត បានសង្កត់ធ្ងន់ថា ក្រោយពីស្ថានភាព​ជំងឺកូវីដ-១៩ បានថមថយ អ្វីៗបានដំណើរការធម្មតាឡើងវិញ ក្នុងនោះគ្រប់បណ្តាផ្នែកទាំងអស់ក្នុងមនី្ទរពេទ្យ បាន​ផ្តល់សេវាព្យាបាលជំងឺជូនដល់ប្រជាពលរដ្ឋគ្រប់ជំនាញ ទន្ទឹមនឹងនោះមនី្ទរពេទ្យក៏បានអភិវឌ្ឍ ដោយមានការគាំទ្រ ពីប្រមុខរាជរដ្ឋាភិបាលគ្រប់ផ្នែកទាំងអស់ មានអគារថ្មី បំពាក់សម្ភារៈបរិក្ខារវេជ្ជសាស្រ្តថ្មីចុងក្រោយបន្ថែមទៀត ដែលកំពុងដំណើរការរាល់ថ្ងៃ ដើម្បីឲ្យការផ្តល់សេវាថែទាំ កាន់តែមានប្រសិទ្ធភាព។ ជាពិសេសមនី្ទរពេទ្យ កំពុងសាងសង់អគារថ្មីមួយបន្ថែមទៀត មានកម្ពស់១០ជាន់ ដែលជាថវិការបស់រាជរដ្ឋាភិបាល។ ដោយឡែកក្រុមការងារគ្រូពេទ្យរបស់យើង ផ្តល់សេវាជូនបងប្អូនប្រជាពលរដ្ឋប្រកបដោយក្រមសីលធម៌វិជ្ជាជីវៈ និងប្រសិទ្ធភាពខ្ពស់បំផុត ដោយមិនទុកឲ្យប្រជាពលរដ្ឋណាមួយ ដែលមានបញ្ហាសុខភាពនោះ មិនទទួលបាន​ការព្យាបាលជំងឺនោះទេ៕ អត្ថបទ៖ រដ្ឋា