ភ្នំពេញ៖ គណៈកម្មការរាជធានីភ្នំពេញរៀបចំការបោះឆ្នោត បានសម្រេចលុបឈ្មោះមនុស្សចំនួន ២១នាក់ ចេញពី​បញ្ជីបោះឆ្នោត​ និងដកសិទ្ធិឈរឈ្មោះឲ្យគេបោះឆ្នោត ក្នុងម្នាក់ៗសម្រាប់រយៈពេល ២០ឆ្នាំ និងផាកពិន័យចំនួន ១០លានរៀល​ក្នុងម្នាក់ៗ ដោយពុំទាន់គិតដល់ទោសព្រហ្មទណ្ឌផ្សេងៗទៀត ។

ការសម្រេចនេះ បានធ្វើឡើងនៅក្នុងសវនាការជំនុំជម្រះនៅរសៀលថ្ងៃទី២៥ ខែកក្កដា ឆ្នាំ២០២៣ ចំពោះមុខ​ដើមបណ្តឹង ​និ​ងកំបាំងមុខចុងចម្លើយ។

ជនដែលជាចុងចម្លើយ គឺសុទ្ធតែជាបុគ្គលនៅក្រៅប្រទេស​ ហើយការកោះអញ្ជើញឲ្យចូលសវនាការសាម៉ីខ្លួនទាំង ២១នាក់ មិនបានចូលរួមទេ។ ដូច្នេះ គណៈកម្មាការរៀបចំការបោះឆ្នោតរាជធានីភ្នំពេញ ប្រជុំសម្រេច​កំបាំង​មុខជន​ចុងចម្លើយ។

គួរបញ្ជាក់ថា កាលពីថ្ងៃទី២៣ ខែកក្កដា ឆ្នាំ២០២៣ មន្ត្រី គ.ជ.ប សហការ​ជាមួយ​សមត្ថកិច្ច​ការពារ​ការិយាល័យ​បោះឆ្នោត បានឃាត់មនុស្សចំនួន ៣នាក់ ពាក់ព័ន្ធការញុះញង់ប្រជាពលរដ្ឋឲ្យបំផ្លាញសន្លឹកឆ្នោត និងការគូស​ខ្វែងសន្លឹកឆ្នោតរួចយកទូរស័ព្ទ គឺនៅការិយាល័យបោះឆ្នោតនៅសាលាបឋមសិក្សាវត្តមហាមន្ត្រី ១ករណី , នៅ​ការិយាល័យបោះឆ្នោតនៅសាលាបឋមសិក្សាស្ទឹងមានជ័យ ១ករណី និងករណីមួយទៀតនៅខេត្តបន្ទាយមានជ័យ គឺសមត្ថកិច្ចចាប់ខ្លួនមន្ត្រីបក្សប្រឆាំង ដែលផ្សព្វផ្សាយញុះញង់ឲ្យប្រជាពលរដ្ឋគូសបំផ្លាញសន្លឹកឆ្នោត៕